મૂળથી મૂળ સુધીની યાત્રાનું નામ જ જિંદગી..

વીતેલા વર્ષનો થાક ઉતારવા નવું વર્ષ ઉત્સાહ, આશા અને રોમાંચ લઈને આવે છે. થાક લાગવાનાં કારણોની ખબર પડે તો થાક ઉતારવાનાં તારણો પણ સાંપડે.

- હિતેન આનંદપરા

થાક જો લાગે કદી અખબારનાં પાનાં ઉપર

સાવ અંગત કોઈની નામાવલીમાં આવજે,

જે તને ગમતા હોય એવા વેશ લેજે તું બધે

પણ ફક્ત અશરફ રૂપે એની ગલીમાં આવજે.

                                                  - અશરફ ડબાવાલા

મુંબઈ જેવાં મેટ્રો શહેરોમાં હાડમારીનો થાક વર્તાય એ સ્વાભાવિક છે. પરાવિસ્તારથી તળ મુંબઈ કારમાં જતો માણસ બે કલાકમાં બેઠાં બેઠાં થાકી જાય. જો કે કોરોના મહામારી પછી ટ્રેનની આવન-જાવનમાં દૈનિક મુસાફરોની સંખ્યા ઘટી છે. સવારના રશ અવર્સ દરમિયાન ટ્રેનમાં ચઢવું ગિરનાર ચઢવા જેવું અઘરું કાર્ય હોય છે, પરંતુ હવે એમાં થોડી હળવાશ આવી છે. એક વેપારી મિત્ર પાસેથી જાણવા મળ્યું કે મજૂરવર્ગનો એક હિસ્સો મહામારીના સમયમાં વતન ગયો એ પાછો આવ્યો જ નથી, જેને કારણે વેપારધંધામાં શ્રમિકોની સમસ્યા નડે છે.

સમસ્યા પ્રવેશે પછીનું પગલું એના ઉકેલ કે સમાધાનનું હોય. જે ક્ષેત્રમાં કારીગરકૌશલ ઓછું હોય ત્યાં યંત્રો સ્થાન લેવા માંડ્યાં છે. રોબોટિક્સની શાખા ખાસ્સી વિસ્તરી રહી છે. રોબો થાકતા નથી. આપણે માણસ છીએ એટલે આપણને થાક લાગવાનો. કદાચ એટલે જ રવિવારની રચના થઈ છે. એકવિધતા આવે તો પોરો ખાવા થોડો સમય જોઈએ. કામ અને વિશ્રામ વચ્ચેનું સંતુલન જીવનશૈલી ઘડે છે.

કામ કરવાનો સંતોષ નવી ઊર્જા ભરે. ઘણી વાર તો કામ જ આપણા હોવાનું વજૂદ બની જાય. ૮૫ વર્ષના એક દાદાને પેટ્રોલ પંપ પર સહર્ષ કામ કરતા જોઈને થયું કે પ્રવૃત્તિ છે એટલે જ એમનું હલનચલન અને જીવંતતા અકબંધ છે. અમિતાભ બચ્ચન ૭૯ વર્ષની ઉંમરે પણ સુપર સક્રિય છે.