હસતાં રહીએ.. વિકસતાં રહીએ!

ખરેખર તો જીવનમાં જીતતાં નહીં, રમતાં શીખવાનું છે. તમે ઈચ્છિત લક્ષ્ય નજર સામે રાખો તો કુદરતી આકર્ષણનો નિયમ એ સફળતાને તમારી નજીક ખેંચી લાવશે. જો કે અમુક સફળતા એવી નવોઢા જેવી છે, જે દહેજમાં કૉલેસ્ટરોલ, સુગર અને પ્રેશર લઈને આવે છે.

મોટિવેશન આપવાનો અધિકાર કોને મળે? એના માટે શું યોગ્યતા હોવી જોઈએ? વિશ્વમાં ઘણા એવા મોટિવેટર છે, જે સફળ દામ્પત્યજીવન વિશે, હૅપ્પી મૅરીડ લાઈફ વિશે બોલે છે. એમાંથી અમુક ડિવોર્સી છે, અમુક સિંગલ છે. અમુક પરણેલા બ્રહ્મચર્ય વિશે બોલે છે તો મેં લખ્યું છે..

જિંદગીમાં આવા કિસ્સા રોજ બનતા હોય છે,

જે સફળ પ્લેયર નથી એ કોચ બનતા હોય છે..

મોટિવેશનલ સ્પીચ એટલે કે પ્રેરણાદાયી પ્રવચનની એક અજાયબ સૃષ્ટિ છે. જીવનમાં, વેપારધંધામાં, ભણતરમાં સફળતાથી લઈને સફળ દામ્પત્યજીવન જેવા અઢળક વિષયો પર ગુજરાતી જ નહીં, બધી જ ભાષામાં પ્રવચન આપવામાં આવે છે. એક ભાઈ કહે છેઃ યુ કૅન વિન. હવે આગામી વર્લ્ડ કપ માટે ઝિમ્બાબ્વે અને નામિબિયા જેવા દેશની ક્રિકેટ ટીમ એમનો સંપર્ક કરવાની છે!

સવાલ એ છે કે જો બધા જ જીતશે તો હારશે કોણ? ખરેખર તો જીવનમાં જીતતાં નહીં, રમતાં શીખવાનું છે. અમુક પુસ્તકો એવું સિક્રેટ શીખવે છે કે તમે ઈચ્છિત લક્ષ્ય નજર સામે રાખો, એને વારંવાર વિઝ્યુઅલાઈઝ કરો તો કુદરતી આકર્ષણનો નિયમ એ સફળતાને તમારી નજીક ખેંચી લાવશે. અમે તો આ વાંચ્યા પહેલાં જ યુવાનીમાં માધુરી દીક્ષિતનો ફોટો રૂમની દીવાલ પર અને મનની દીવાલ પર લગાડીને એ અમને વરમાળા પહેરાવે છે એવું રોજ વિઝ્યુઅલાઈઝ કરતા હતા. તમે પણ કર્યું હશે. એમ.એફ. હુસૈને પણ કરેલું, પરંતુ માધુરી આવી આપણા ઘરે? કંકુથાપા કર્યા આપણા બારણે? આખરે થાપ આપીને પેલો ડૉક્ટર નેને જ એને લઈ ગયો ને?

- જો ગધેડાની આગળ ગાજર મૂકવાને મોટિવેશન કહેતા હોય તો એ મને આવડતું નથી.

- જો ઘોડાને ચાબુક લગાવી એને દોડાવવાને મોટિવેશન કહેતા હોય તો એ મને આવડતું નથી.

છેલ્લાં પચ્ચીસ વર્ષોમાં સાઈકોલૉજી અને સાહિત્યના માધ્યમથી મેં જીવનને સમજવાની કોશિશ કરી છે અને આજે હું જે શૅર કરવા જઈ રહ્યો છું એ આમ તો નાની નાની વાતો છે.

દર્દ સુનના યા સુનાના હો તો હમ સે મિલના

થોડા હસને કા ઈરાદા હો તો હમ સે મિલના

વૈસે કઈ લોગ મુલાકાત કે કાબિલ હોંગે

તુમ કો ખુદ સે કભી મિલના હો તો હમ સે મિલના