કોણ સ્વાર્થી? કોણ નિઃસ્વાર્થી?

અનેક લોકોનાં મોત પાછળ જવાબદાર એવા આરોપીઓ છટકી ગયા ત્યારે પ્રજાવત્સલ રાજપરિવાર મોરબી દોડી આવીને રૈયતની પડખે ઊભો રહ્યો. તંત્રની મદદ પહોંચે એ પહેલાં સ્થાનિક યુવાનોએ બચાવકાર્યની આગેવાની લીધી. દોષિતો સામે કાર્યવાહીમાં ઠાગાઠેયા હવે પજવી રહ્યા છે.

- દેવેન્દ્ર જાની (રાજકોટ)

ગુજરાત ઈલેક્શન મોડમાં આવી ગયું છે, પરંતુ મોરબીની શેરીઓમાં હજુ ડૂસકાં સંભળાય છે. ૧૩૫ નિર્દોષને મોતના મુખમાં ધકેલી દેનારી કરુણાંતિકામાં જેમની નૈતિક જવાબદારી છે એવાં મોટાં માથાં ભૂગર્ભમાં ઊતરી ગયાં છે, જ્યારે રાજવી પરિવાર સહિત અનેક લોકો માનવતાને ખાતર પીડિતોની મદદે દોડી આવ્યા છે. એ રીતે આ દુર્ઘટના સમાજજીવનના બે અંતિમોને બહાર લાવી છે.

ઝૂલતો પુલ તૂટ્યાના એક સપ્તાહ બાદ પણ મોરબીની સાંકડી ગલીઓમાં પગ મૂકતાં હજુ એક જ પ્રશ્ન હવામાં ઘુમરાય છે કે સરકાર કેમ એકાદ-બે અધિકારીઓ સામે પગલાં લઈને સંતોષ માની રહી છે? આ હોનારતમાં પાંચ દિવસ સુધી રેસ્ક્યુ ઑપરેશન ચાલ્યું, હવે તંત્ર અને નેતાઓ તો ચૂંટણીનાં કામમાં લાગી ગયા છે, પરંતુ સ્વજન ગુમાવનારા પરિવારો આઘાતમાં જ છે.

સ્થાનિક વહીવટી તંત્ર અને પુલના નવીનીકરણની જવાબદારી લેનારા ઓરેવા ગ્રુપ પર બેદરકારીને લઈને માછલાં ધોવાઈ રહ્યાં છે, પણ મંગળવાર, ૮ નવેમ્બરની સાંજે આ લખાઈ રહ્યું છે ત્યાં સુધી આ ઓરેવા ગ્રુપના સર્વેસર્વા એવા જયસુખભાઈ પટેલે મૃતકોને બે શબ્દોની અંજલિ પણ આપી નથી. ઊલટાનું એ તો આખા પ્રકરણથી દૂર ભાગી રહ્યા છે. અરે, એમણે ઑડિયો-વિડિયો ક્લિપની મદદથી પણ પ્રતિક્રિયા આપવાનું ટાળ્યું છે. આવી પલાયનવૃત્તિની ટીકા ન થાય તો જ નવાઈ. ચૂંટણીના માહોલમાં સરકાર પણ એમની સામે આકરાં પગલાં લેવાનો ઈરાદો ધરાવતી ન હોવાની છબી ઊપસી છે.

નદીમાંથી લોકોને ઉચ્ચારવાનું કામ મકરાણી વાસના યુવાનો તથા ‘યંગ ઈન્ડિયા ગ્રુપ’ની ટીમે ઉપાડી લીધું.