દવા જ્યારે દર્દ બની જાય..

તંદુરસ્ત રહેવા એક્સરસાઈઝ કરવા જિમ્નેશિયમમાં જનારી યુવા સેલિબ્રિટીનાં મોત હમણાં વધી રહ્યાં છે. શારીરિક ચુસ્તીસ્ફૂર્તિને બદલે શરીરના બાંધા અને લુક્સને વધારે મહત્ત્વ આપવામાં આવે ત્યારે આવો અનર્થ સર્જાય છે એવું કહે છે એક્સ્પર્ટ્સ.

- કેતન મિસ્ત્રી (મુંબઈ)

આ કિસ્સો પંદરેક દિવસ અગાઉનો. તેલુગુ ફિલ્મ ઈન્ડસ્ટ્રીનો ખૂબ જાણીતો નાગ શોર્ય નામનો ઍક્ટર શૂટિંગ દરમિયાન ઢળી પડે છે અને હોશ ગુમાવી દે છે. તાવમાં તરફડતા નાગ શૌર્યને હૉસ્પિટલ લઈ જવામાં આવે છે, જ્યાં નિદાન થાય છેઃ અતિગંભીર કહેવાય એવું ડિહાઈડ્રેશન. બનેલું એવું કે સ્ટાર ભાઈએ આગામી ફિલ્મની ભૂમિકા માટે સિક્સ ફૅક્સ લાવવા નૉન-લિક્વિડ ડાયેટ અર્થાત્ પાણી કે પ્રવાહીથી દૂર રહેવાની પરેજી અપનાવેલી. આ સાથે એ તનતોડ એક્સરસાઈઝ પણ કરતો.

એ પહેલાં ૪૬ વર્ષી ઍક્ટર સિદ્ધાર્થ સૂર્યવંશી જિમ્નેશિયમમાં ઢળી પડે છે. કુસુમ, વારિસ અને સૂર્યપુત્ર કર્ણ જેવી ટીવીસિરિયલોનો અભિનેતા સિદ્ધાર્થ કસરત કરતાં કરતાં એકાએક ફસડાઈ પડતાં એનું મોત થાય છે. જિમમાં વર્કઆઉટ્સ દરમિયાન થયેલાં મોતમાંનું આ લેટેસ્ટ.

- તો કૉમેડિયન રાજુ શ્રીવાસ્તવની તબિયત જિમ્નેશિયમમાં અચાનક બગડી જતાં એને દિલ્હીની એઈમ્સ હૉસ્પિટલમાં દાખલ કરવામાં આવે છે.

ડૉક્ટરના જણાવ્યા મુજબ, જિમ્નેશિયમમાં જ એમને હાર્ટ અટેક આવેલો અને ત્યાર બાદ એમને એક પછી એક શારીરિક સમસ્યા થવા માંડી. એકાદ મહિનો વેન્ટિલેટર પર રહ્યા બાદ એમનું અવસાન થયું.. ગયા વર્ષે મશહૂર કન્નડ ઍક્ટર પુનિત રાજકુમારને પણ જિમ્નેશિયમમાં કસરત કરતી વખતે હાર્ટ અટેક આવેલો. હુમલો આવ્યા બાદના ગણતરીના સમયમાં ૪૬ વર્ષી પુનિતનું અવસાન થયું.

ફિટનેસ ટ્રેનર પવનસિંહ: વજન નહીં, ચરબી ઉતારવાનું લક્ષ રાખો.

આ બધાં જિમ ડેથ અથવા કસરતશાળામાં થયેલાં મૃત્યુ માટે નક્કી શું કારણ હશે એ તો ખબર નથી, પણ જાણકારો સ્ટેરોઈડ્ઝની શક્યતા નકારતા નથી. હા, સૌથી કૉમન કારણ છે બાવડાં બનાવવા માટે એન્હેન્સર તરીકે લેવામાં આવતાં સ્ટેરોઈડ્ઝ. દેશનાં નાનાં નગરમાંથી રણબીર કપૂર કે જોન અબ્રાહમ બનવા આવેલા સંઘર્ષશીલ નવોદિત ઍક્ટરો અથવા સોશિયલ મિડિયા પર પ્રશંસકોની સંખ્યા જાળવી રાખવાની મથામણ કરતી સેલિબ્રિટી સ્ટેરોઈડ્ઝનો આડેધડ ઉપયોગ અને એક્સ્પર્ટની સલાહ લીધા વિના મુસીબત વહોરી લેતાં હોય છે.

ગયા વર્ષે ૪૦ વર્ષી ઍક્ટર સિદ્ધાર્થ શુક્લાનું મૃત્યુ જો કે જિમમાં નહોતું થયું, પણ એવી વાત વહેતી થયેલી કે એના મોતનું કારણ હતું વ્યાયામનો અતિરેક અને સ્નાયુબદ્ધ શરીર બનાવી આપવાનો દાવો કરતાં પીણાં, વગેરે.