પોલીસ સામે જ પોલીસકેસ!

સાળી-બનેવીની લડાઈમાં મરો કોનો?

- રાજુ પટેલ

તમે એક દિવસ ઑફિસે સમયસર ન આવી શકો?’

‘હું સમયસર જ આવ્યો હતો, સર. મારો ટાઈમ અગિયાર વાગ્યાનો છે. આજે તો હું પાંચ મિનિટ વહેલો આવેલો!'

‘તમે એક દિવસ ઑફિસે વહેલા ન આવી શકો?’ મોતીવાલાએ એટલા જ ગુસ્સામાં મને પૂછ્યું.

‘પણ વાત શું છે?’

‘પરિણીતી આજે ઑફિસમાં સાડા દસ વાગ્યે આવી ગઈ હતી.’

‘સર, તમારી સાળી તમારી ઑફિસમાં ક્યારે આવે એ કોણ નક્કી કરી શકે? તમે મને આખી વાતમાં શું કામ ભેરવો છો?’

‘હું એને ઑફિસે મોડા આવવા ન કહી શકું, પણ તમને તો વહેલા આવવા કહી શકું! આજે એક દિવસ વહેલા આવી એણે એવું રાયતું ફેલાવી દીધું છે કે મારું મગજ બહેર મારી ગયું છે. ખબર છે, એણે શું કર્યું છે? પોલીસ ઈન્સ્પેક્ટર વિરુદ્ધ પોલીસફરિયાદ લખાવી દીધી છે!’

હું ચમકી ગયો.

આજે મોતીવાલા ઑફિસે આવવા નીકળ્યા ત્યાં કોઈ ઈન્સ્પેક્ટર શાનબાગે એમને ફોન કરી ખખડાવી નાખ્યાઃ ‘તું શું તારી જાતને બહુ મોટો માણસ સમજે છે? તેં એક પોલીસ ઈન્સ્પેક્ટર સામે જ પોલીસમાં ફરિયાદ લખાવી છે?’

મોતીવાલાને પહેલાં તો કંઈ સમજાયું નહીં, પછી એમને યાદ આવ્યું કે પરિણીતી ઑફિસે જવા નીકળી ગઈ છે. એણે જ નક્કી કંઈક લોચો માર્યો હશે એમ લાગતાં પરિણીતીને ફોન જોડ્યો તો ખબર પડી કે સુહાસિની શાનબાગ નામની એક મહિલા અમારી ઑફિસે કન્સલ્ટન્સી માટે આવી અને પરિણીતીને મળી હતી. એની સમસ્યા એ હતી કે એનો પતિ એને માનસિક અને શારીરિક ત્રાસ આપતો હતો. સ્ત્રીઓ પ્રત્યેના અન્યાયથી પિત્તો ગુમાવી દઈ પરિણીતીએ સુહાસિનીને પોલીસમાં ફરિયાદ કરવા સલાહ આપી. સુહાસિનીએ કહ્યું કે એનો પતિ પોલીસ ઈન્સ્પેક્ટર જ છે, પણ એ સાંભળીને તો પરિણીતી વધુ ઉશ્કેરાઈ કે પોલીસખાતામાં હોય એ ગુનો કરે તો વધુ ગંભીર બાબત કહેવાય-જરૂર પોલીસમાં રિપોર્ટ કરો..

હકીકત જાણી મોતીવાલાએ કપાળ કૂટ્યું અને ઈન્સ્પેક્ટર શાનબાગને ફોન કરી માફી માગી કે મેરી સાલી અભી અભી લંડન સે આઈ હૈ, ગલતી હો ગઈ..

એ પછી પેલા ઈન્સ્પેક્ટરે મોતીવાલાને જે ભાષામાં ખખડાવ્યા એનો મતલબ ટૂંકમાં એ હતો કે એની પત્ની ફરિયાદ પાછી નહીં ખેંચે તો એ પોલીસવાળો મોતીવાલાને કોઈ કેસમાં ભેરવી જેલભેગો કરી દેશે!