બનિયે કા દિમાગ, કચ્છી માડું કી ડેરિંગ!

ઈન્ગ્રેડિયન્ટ્સઃ કોઠાસૂઝ, પુરુષાર્થ ને સાહસ. રીતઃ કોઠાસૂઝ, પુરુષાર્થ, ને સાહસ માપસર લઈ એમાં સંઘર્ષની સોડમ ઉમેરો.. અને લો, બની ગયું એક સ્વાદિષ્ટ ફૂડ એમ્પાયરઃ ‘ચાર્લી ચીકી’.

- કેતન મિસ્ત્રી 

‘હ લ હલ, ઝપાટો કર..' શેઠની હાંક સાંભળી ૧૫-૧૬ વર્ષના શાંતિલાલે ઝડપ વધારી. પોતાના જેવી ખડતલ ઍટલાસ સાઈકલ પર ૬૦-૭૦ કિલો કરિયાણું ખડકીને ચાલવા માંડ્યું. લિસ્ટ લાંબું હતું, દિવસ ટૂંકો હતો અને સરનામાં ગગનને આંબતાં હતાં. ભાગ્યે જ કોઈ બિલ્ડિંગમાં ચોકીદાર લિફ્ટ વાપરવા દે. બાકી તો માલની ડિલિવરી દાદરા ચડીને જ કરવાની. દિવસઆખો મજૂરી કરીને શાંતિલાલ દુકાનની પાછળ સાંકડા ગોદામમાં ગૂણીની થપ્પી પર લંબાવે કે તરત નિદ્રાદેવી વહાલ કરવા આવી ચડે. વહેલી પડે સવાર.

૧૯૬૯-૧૯૭૦ની સાલના એવા મુંબઈમાંથી હવે આવી જઈએ વર્તમાનના વલસાડમાં. ધરમપુરના રસ્તે ઠક્કરવાડા ગામની સીમમાં આવેલી ૧૩ એકરની વિશાળ ભૂમિ પર ૬૯ વર્ષી શાંતિલાલ આદેશો વીંઝી રહ્યા છેઃ ‘હાલો હાલો, ઝપાટો કરો..

પ્રખ્યાત ચાર્લી ચીકી તથા કંઈકેટલા નાસ્તા બનાવતી કંપની જય ચીકી ઍન્ડ સ્નેક્સ પ્રાઈવેટ લિમિટેડના સ્થાપક શાંતિલાલ કલ્યાણજી સાવલા ચિત્રલેખાને કહે છે: ‘ટૂંક સમયમાં વલસાડના વશિયેર વિસ્તારમાં આવેલી ફૅક્ટરી અહીં શિફ્ટ થશે. આશરે દોઢ લાખ ચોરસફૂટ વિસ્તારમાં પ્લાન્ટ, ઍડ્મિનિસ્ટ્રેટિવ બિલ્ડિંગ, વગેરે હશે. બાઉન્ડરી વૉલ તૈયાર છે, જમીન સમથળ થઈ ગઈ છે, નવરાત્રિથી બાંધકામ ચાલુ થઈ જશે.’

એ પછી એક શેડ નીચે બેસી એ પોતાની વિવિધ રંગના શેડવાળી જીવનકથા આલેખે છે..

કચ્છના મુન્દ્રા તાલુકાના રામાણિયા ગામમાં ૧૯૫૪ના સપ્ટેમ્બરમાં જન્મ. રામાણિયાની એક આગવી ઓળખ એટલે લિજ્જત પાપડનું મોટું મૅન્યુફેક્ચરિંગ સેન્ટર. ખેર. સાવલાપરિવાર દારુણ ગરીબીનો સામનો કરે. ગામના એસટી સ્ટેન્ડ પાસે કલ્યાણજીભાઈ ચાની લારી ચલાવે. એક આનાની ચા. આઠ-નવ વર્ષનો પુત્ર શાંતિલાલ ઘરાકોને ચા આપવાથી લઈને કપ-રકાબી ધોવા જેવાં કામ કરે. પાંચ ભાઈ-બહેનોમાં સૌથી મોટા શાંતિલાલ. સાત જણનો પરિવાર. ચાની લારી પરથી ફૂરસદ મળતાં શાંતિલાલ નજીકના ફરાદી ગામમાં કોઈની જમીન પર ખેતમજૂરી કરે. હળ ચલાવતાં ચલાવતાં એમના મનમાં વિચાર ચાલે કે આપણી આવી જમીન હોય તો..

અહીં ચીકી ઉપરાંત જાતજાતનાં ફરસાણ, ખાખરા, શરબત-ફાલુદા જેવી દોઢસો જેટલી ચીજવસ્તુ બની હાઈજિનિક પૅકેજિંગમાં બંધ થઈ દેશ-દુનિયામાં પહોંચે છે.. આ તમામ ચીજવસ્તુ વેચતો વલસાડમાં આવેલો ‘ચાર્લી ડે ટુ કે સ્ટોર્સ’.