આ ઘરો બાંધનારાનાં ઘર કોણ તોડશે?

‘કાયદો આંધળો છે’ એવું આપણે વર્ષોથી સાંભળીએ છીએ, પણ જે લોકો પર કાયદાના અમલની જવાબદારી હોય એ જ કાનૂનનું છડેચોક ઉલ્લંઘન કરે અને એનું પાપ બીજા કોઈએ ભોગવવાનું આવે ત્યારે સામાન્ય માણસ અદાલત પાસે ન્યાયની અપેક્ષા રાખે, પણ...

- હીરેન મહેતા

ક્યારેક બહુ દૂરનું જોવામાં વ્યસ્ત માણસ નજીકમાં ચાલતી ગતિવિધિ નિહાળવાનું ચૂકી જાય છે. ગાઝા પટ્ટીમાં ઈઝરાયલની મિસાઈલ્સથી મકાનોનાં મકાન ઉધ્વસ્ત થઈ ગયાં અને હજી ક્યારેક ક્યારેક ઈઝરાયલના હુમલા ચાલે જ છે.

મુંબઈ નજીકના વિસ્તારિત ઉપનગર નાલાસોપારામાં અદાલતના મિસાઈલ જેવા જ એક આદેશને પગલે હમણાં આવાં ૪૦થી વધુ મકાનો ઉધ્વસ્ત થયાં અને ૧૫૦૦ જેટલા પરિવાર સડક પર આવી ગયા. આ તમામ મકાન સરકારી માલિકીની જમીન પર એમ ને એમ અર્થાત્ કોઈ પ્રકારની મંજૂરી વગર ઊભાં કરી દેવામાં આવ્યાં હતાં. એક તો બધી ઈમારતો સરકારી જમીન પર હતી એટલે એના પર કોઈ ખાનગી માલિકીનું મકાન ઊભું ન થઈ શકે અને બીજું, અહીં તો એકેય ઈમારત માટે પરવાનગી લેવામાં આવી નહોતી એ બે કારણસર તમામ મકાનોનાં ઘર ગેરકાયદે ઠર્યાં અને મુંબઈ વડી અદાલતે એ મકાનોને તોડી પાડવાનો ફેંસલો આપ્યો. સર્વોચ્ચ અદાલતે પણ આ ફેંસલો માન્ય રાખ્યો. પરિણામે સ્થાનિક પ્રશાસને ન્યાયતંત્રની પૂરેપૂરી આમન્યા જાળવીને એ ઈમારતોને ભોંયસપાટ કરવા માંડી.

વાત એકદમ વાજબી છે. મકાન ગેરકાયદે છે તો એ તોડવાં જ જોઈએ. ન્યાય એટલે ન્યાય. ઉત્તર પ્રદેશમાં મુખ્ય મંત્રી યોગી આદિત્યનાથની બુલડોઝર ઝુંબેશ ઘણાને બહુ ગમી છે. કોઈ ખોટું કરે તો ન્યાયતંત્રની લાંબીલચક પ્રક્રિયાની લપ્પનછપ્પનમાં પડ્યા વગર જ ચુકાદોઃ આરોપીનું ઘર તોડી નાખો એટલે એને તાત્કાલિક સજા મળ્યાનું ભાન થાય.