સ્ટારબાલુડાની ઓટીટીથી એન્ટ્રીઃ ચતુરાઈ કે નાદાનિયાં?

જુનૈદ ખાન, સુહાના ખાન, ખુશી કપૂર, ઈબ્રાહિમ અલી ખાન થિયેટરમાં મેળ નહીં પડે, હવે તો ઓટીટી એ જ કલ્યાણ.

- રઘુ જેટલી

રઘુ જ્યારે ફિલ્મ પત્રકારત્વમાં પા પા પગલી ભરતો હતો ત્યારે, ૧૯૯૦ના દાયકાના આરંભમાં એક સમી સાંજે એ મુંબઈમાં જુહૂ સાગરતટ પર આવેલી સન-ઍન-સૅન્ડ હોટેલમાં કુકુ કોહલી દિગ્દર્શિત ફૂલ ઔર કાંટે ફિલ્મના ફંક્શનમાં ગયેલો. આ ફિલ્મથી ઍક્શન ડિરેક્ટર વીરુ દેવગનના બેટા અજય અને હેમા માલિનીની ભાણેજ મધુના ફિલ્મપ્રવેશ થઈ રહ્યા હતા. ધામધૂમ સાથે મ્યુઝિક કૅસેટ રિલીઝ કરવામાં આવી, ડિરેક્ટર તથા અજય-મધુના ઈન્ટરવ્યૂ, મોડી રાત સુધી કૉકટેલ, ડિનર... ફિલ્મ નિઃશંક સુપરહિટ હતી.

વસ્તુ એવી છે કે એક સમય હતો, જ્યારે સ્ટારબાલુડાંને ધમાકેદાર લૉન્ચ કરવામાં આવતાં. આમીર, સૈફ, સલમાન જેવા ખાન લોકો હોય, કરિશ્મા કપૂર-હૃતિક રોશન-અભિષેક બચ્ચન-કરીના કપૂર-આલિયા ભટ્ટઅનન્યા પાંડે હોય કે પછી ડેવિડ ધવનનો બેટો વરુણ ધવન હોય કે જેકીનો ટાઈગર.

પછી આવ્યો ગોઝારો કોવિડ ને બોલીવૂડવાળાની મહુડાની મસ્તી બંધ થઈ ગઈ. એ કાળમાં મનોરંજનનાં અઢળક માધ્યમ હથેળીવગાં થયાં. આજે પરિસ્થિતિ એવી છે કે અમુક માતબર ફિલ્મ પ્રોડક્શન કંપનીથી લઈને થિયેટરવાળા ટકી રહેવા સંઘર્ષ કરી રહ્યા છે.