ഹയർ സെക്കൻഡറി തസ്തികമാറ്റം അധ്യാപകസംഘടനകളുടെ നിലപാടിൽ പ്രതിഷേധം

വിശേഷാൽചട്ടം ഭേദഗതിക്ക് മുൻകൈയെടുക്കുന്നില്ലെന്നാണ് അധ്യാപകരുടെ പരാതി

- ആർ. ജയപ്രസാദ്

സർക്കാർ ഹയർ സെക്കൻഡറിയിലെ ജൂനിയർ അധ്യാപക തസ്തികയിലേക്ക് ഹൈസ്കൂൾ-പ്രൈമറി അധ്യാപകരുടെ തസ്തികമാറ്റവിഷയത്തിൽ സംഘടനകൾ നടത്തുന്ന ഒളിച്ചുകളിക്കെതിരേ അധ്യാപകർ രംഗത്ത്. വിശേഷാൽ ചട്ടം ഭേദഗതിക്ക് മുൻകൈയെടുക്കുകയോ തസ്തികമാറ്റം നിയമപരമായി നടപ്പാക്കാൻ തയ്യാറാവുകയോ ചെയ്യുന്നില്ലെന്നാണ് സംഘടനകൾക്കെതിരേയുള്ള പരാതി. സംഘടനകളുടെ ചുമതലക്കാരിൽ പലരും എയ്ഡഡ് അധ്യാപകരോ തസ്തികമാറ്റപരിധിയിൽ വരാത്ത സർക്കാർ സ്കൂൾ അധ്യാപകരോ ആണെന്നാണ് ആരോപണം. ഇരുകൂട്ടർക്കും മറ്റുള്ളവർക്ക് സ്ഥാനക്കയറ്റം ലഭിക്കുന്നതിൽ താത്പര്യമില്ലെന്ന സ്ഥിതിയാണ്. ഹൈസ്കൂളിലോ പ്രൈമറിയിലോ ജോലി ചെയ്യുമ്പോൾ സംഘടനകളുടെ ഭാഗമായി നിൽക്കുന്നവർ തസ്തികമാറ്റം ലഭിച്ചാൽ മറ്റു സംഘടനകളിലേക്കു പോകുമെന്നതാണ് പ്രധാന സംഘടനകൾ ഇക്കാര്യത്തിൽ വിമുഖരാകാൻ കാരണമെന്ന് അധ്യാപകർ കുറ്റപ്പെടുത്തുന്നു.