ഡോ. അയ്യത്താൻ ഗോപാലൻ കേരളത്തിന്റെ രാജാറാം മോഹൻറോയ്

രാജാറാം മോഹൻറോയ് സ്ഥാപിച്ച ബ്രഹ്മസമാജത്തിന്റെ കേരളത്തിലെ മുഖ്യ പ്രചാരകനായിരുന്നു ഡോ. അയ്യത്താൻ ഗോപാലൻ. വിശ്വമഹാകവിയായ രവീന്ദ്രനാഥ ടാഗോർ അദ്ദേഹത്തെ വിശേഷിപ്പിച്ചത് ‘കേരളത്തിന്റെ രാജാറാം മോഹൻറോയ്' എന്നാണ്

1861 മാർച്ച് മൂന്നിന് തലശ്ശേരിയിലെ ആഢ്യ കുടുംബമായ അയ്യത്താൻ തറവാട്ടിലാണ് ഗോപാലന്റെ ജനനം. അയ്യത്താൻ ചന്തൻ, കല്ലാട്ട് ചിരുതയമ്മാൾ എന്നിവർ മാതാപിതാക്കൾ. നാട്ടിലെ വിദ്യാഭ്യാസത്തിനു ശേഷം 1884-ൽ മദ്രാസ് മെഡിക്കൽ കോളേജിൽ വൈദ്യപഠനത്തിന് ചേർന്നു. നന്നേ ചെറുപ്പത്തിൽത്തന്നെ ജാതിവിവേചനങ്ങളെ പരസ്യമായി എതിർത്തിരുന്നു. സുഹൃത്തായ ഒരു മത്സ്യത്തൊഴിലാളിയുടെ വീട്ടിൽ വിവാഹത്തിനു പോയതിന്റെ പേരിൽ കുടുംബ കാരണവരുടെ അപ്രീതിക്ക് പാത്രമായി. മാത്രമല്ല ജാത്യാഭിമാനത്തിന്റെ ലക്ഷണമായ കുടുമ സ്വയം മുറിച്ചുകളഞ്ഞതും ആചാരലംഘനങ്ങളിൽ കാരണവരെ ചൊടിപ്പിച്ചു. കുപിതനായ കാരണവർ മാതൃഗൃഹത്തിൽനിന്ന് ഗോപാലനെ പുറത്താക്കി. തുടർന്നുള്ള താമസം അഞ്ചരക്കണ്ടിയിലെ പിതൃഗൃഹത്തിലായിരുന്നു.