116வது பிறந்தநாள் விழா கொண்டாட்டம் காஞ்சிபுரத்தில் உள்ள அண்ணா நினைவு இல்லத்தில் பல்வேறு கட்சியினர் மரியாதை

பேரறிஞர் அண்ணாவின் 116வது பிறந்தநாள் விழாவை முன்னிட்டு காஞ்சிபுரத்தில் உள்ள அண்ணா நினைவு இல்லத்தில் பல்வேறு கட்சியினர் மரியாதை செலுத்தினர்.

மேலும் அன்னதானம் மற்றும் இனிப்பு வழங்கி மகிழ்ந்தனர். பேரறிஞர் அண்ணாவின் பிறந்த நாள் விழா நேற்று காஞ்சிபுரத்தில் கொண்டாடப்பட்டது. காஞ்சிபுரத்தில் உள்ள அவரது இல்லத்தில் வைக்கப்பட்டுள்ள திருவுருவச் சிலைக்கு பல்வேறு அரசியல் கட்சியினர் மற்றும் அமைப்பினர் மாலை அணிவித்து இனிப்பு வழங்கி கொண்டாடினார்.

அரசு சார்பில் அமைச்சர் தா.மோ. அன்பரசன், கலெக்டர் கலைச்செல்வி மோகன் உள்ளிட்டோர் மாலை அணிவித்தனர்.

இதில் திமுக சார்பில் காஞ்சிபுரம் தெற்கு மாவட்டச் செயலாளர் க.சுந்தர் எம்எல்ஏ தலைமை தாங்கி, அண்ணாசிலைக்கு மாலை அணிவித்து இனிப்புகளை வழங்கினார். க.செல்வம் எம்பி, மாணவரணி செயலாளர் வக்கீல் எழிலரசன் எம்எல்ஏ ஆகியோர் முன்னிலை வகித்தனர். காஞ்சிபுரம் மாநகரச் செயலாளர் தமிழ்ச்செல்வன் வரவேற்பு பேசினார். இதேபோல் காஞ்சிபுரம் மாநகராட்சி அலுவலகத்தில் உள்ள அண்ணாசிலைக்கு மாலை அணிவித்து மரியாதை செலுத்தப்பட்டது.

இதில் மாநகராட்சி மேயர் மகாலட்சுமி யுவ ராஜ், மாவட்ட பொருளாளர் சன் பிராண்ட் ஆறுமுகம், தலைமை பொதுக்குழு உறுப்பினர்கள் சுகுமார், சீனிவாசன், செயற்குழு உறுப்பினர் சிகாமணி, ஒன்றியச் செயலாளர்கள் குமார், குமணன், படுநெல் வீபாபு, பகுதிச் செயலாளர்கள் சந்துரு, தசரதன், திலகர், வெங்கடேசன், தொமுச பேரவை நிர்வாகிகள் சுந்தரவதனம், இளங்கோவன், மாநகர நிர்வாகிகள் செங்குட்டுவன், முத்து செல்வம், ஜெகநாதன், சுப்பு ராயன், மாவட்ட இளைஞரணி நிர்வாகிகள் யுவராஜ், ராமகிருஷ்ணன், செவிலி மேடு மோகன் மற்றும் நகர ஒன்றிய நிர்வாகிகள் உள்கிற ஏராளமான திமுகவினர் கலந்துகொண்டனர்.

அதிமுக சார்பில் மேற்கு மாவட்டச் செயலாளர் சோமசுந்தரம் அண்ணாவின் திருவுருவச் சிலைக்கு மாலை அணிவித்து மரியாதை செலுத்தினார்.