அதிமுக முன்னாள் அமைச்சர் வைத்திலிங்கம், மகன் மீது சொத்து குவிப்பு வழக்கு பாய்ந்தது

₹36.58 லட்சமாக இருந்த சொத்தின் மதிப்பு 5 ஆண்டுகளில் ₹32.47 கோடியாக அதிகரிப்பு: அதிமுக முன்னாள் அமைச்சர் வைத்திலிங்கம், மகன் மீது சொத்து குவிப்பு வழக்கு பாய்ந்தது

சென்னை: 2011ம் ஆண்டு ரூ.36.58 லட்சமாக இருந்த சொத்தின் மதிப்பு அதிமுக ஆட்சி காலத்தில் அமைச்சராக பணியாற்றிய 2011-2016ம் ஆண்டு காலத்திற்கு பிறகு சொத்தின் மதிப்பு ரூ.32.47 கோடி என 1,057 சதவீதமாக உயர்ந்துள்ளது. இதையடுத்து வருமானத்திற்கு மீது சொத்துக்கள் சேர்த்ததாக முன்னாள் அதிமுக அமைச்சர் வைத்திலிங்கம் மற்றும் அவரது மகன் பிரபு மீது லஞ்ச ஒழிப்புத்துறை சொத்து குவிப்பு சட்டப்பிரிவின் கீழ் வழக்கு பதிவு செய்து விசாரணை நடத்தி வருகின்றனர்.

தஞ்சை மாவட்டம் ஒரத்தநாடு தாலுக்கா தெலுகன்குடிக்காடு கிராமத்தைச் சேர்ந்தவர் வைத்திலிங்கம். நடுத்தர விவசாய குடும்பத்தை சேர்ந்த இவருக்கு தங்கம் என்ற மனைவி, 3 மகன்கள் மற்றும் ஒரு மகள் உள்ளனர். வைத்திலிங்கம் ஒரத்தநாடு தொகுதியில் அதிமுக சார்பில் போட்டியிட்டு 3 முறை எம்எல்ஏவாக தேர்ந்தெடுக்கப்பட்டுள்ளார். அந்த வகையில் 2011-2016ம் ஆண்டு அதிமுக ஆட்சிகாலத்தில் வீட்டு வசதி துறை மற்றும் கூடுதலாக விவசாயத்துறை அமைச்சராக வைத்திலிங்கம் பதவி வகித்தார்.

வைத்திலிங்கம் தனது பதவி காலத்தில் ஸ்ரீராம் பிராப்பர்ட்டீஸ் நிறுவனம் சார்பில் கட்டப்பட்ட அடுக்குமாடி குடியிருப்பு திட்டத்திற்கு அனுமதி வழங்கிய விவகாரத்தில் ரூ.27.90 கோடி தனியார் நிறுனங்கள் மூலம் லஞ்சமாக பெற்றதாக குற்றச்சாட்டு எழுந்தது. இதுகுறித்து அளிக்கப்பட்ட புகாரின் படி லஞ்ச ஒழிப்புத்துறை அதிகாரிகள் நடத்திய விசாரணையில், ஸ்ரீராம் பிராப்பர்ட்டீஸ் நிறுவனத்திற்கு தொடர்புடைய நிறுவனங்கள் மூலமாக முன்னாள் அமைச்சர் வைத்திலிங்கத்தின் முத்தம்மாள் ரியல் எஸ்டேட் நிறுவனத்திற்கு ரூ.27.90 கோடி லஞ்சப்பணம் கொடுக்கப்பட்டது தெரியவந்தது.