நாட்டின் 50வது தலைமை நீதிபதி விடைபெற்றார் சந்திரசூட்

நாட்டின் 50வது தலைமை நீதிபதி சந்திரசூட் நேற்று தனது கடைசி வேலை நாளில் விடைபெற்றார். புதிய தலைமை நீதிபதி சஞ்சீவ் கண்ணா நவ.11ல் பதவி ஏற்க உள்ளார்.

இந்தியாவின் 50வது தலைமை நீதிபதி டி.ஒய்.சந்திரசூட் 2022 நவம்பர் 9ம் தேதி பதவி ஏற்றார். அவரது பணிக்காலம் நாளை முடிவுக்கு வருகிறது. இந்தநிலையில் அவரது பதவியின் கடைசி பணி நாளான நேற்று உச்ச நீதிமன்றத்தில் இருந்து சந்திரசூட் விடை பெற்றார்.

புதிய தலைமை நீதிபதியாக நவ.11ல் பதவி ஏற்க உள்ள சஞ்சீவ் கண்ணா, நீதிபதிகள் ஜேபி பர்திவாலா, மனோஜ் மிஸ்ரா ஆகியோர் அடங்கிய அமர்வில் இருந்த தலைமை நீதிபதி சந்திரசூட், அந்த அமர்வில் இருந்து விடைபெற்றார். அவருக்கு அட்டர்னி ஜெனரல், சொலிசிட்டர் ஜெனரல், உச்ச நீதிமன்ற பார் அசோசியேஷன் தலைவர் கபில் சிபல் உள்பட பலர் வாழ்த்து தெரிவித்தனர். அவர்களது வாழ்த்துக்கு நன்றி தெரிவித்து சந்திரசூட் பேசுகையில்,’ என்னைத் தொடர்ந்து நடத்துவது எது என்று கேட்டீர்கள்.

இந்த நீதிமன்றம்தான் என்னைத் தொடர்ந்து நடத்த வைத்தது. தேவையில் இருப்பவர்களுக்கும், நீங்கள் சந்திக்காதவர்களுக்கும், உங்களுக்குத் தெரியாத நபர்களுக்கும், அவர்களைப் பார்க்காமலேயே உங்கள் வாழ்க்கையை பாதிக்கும் திறன் கொண்டவர்களுக்கும் சேவை செய்வதை விட மேலான உணர்வு எதுவும் இல்லை. இளம் சட்ட மாணவராக இந்த நீதிமன்றத்தின் கடைசி வரிசையில் அமர்ந்தது முதல் இப்போது தலைமை நீதிபதியாக பதவி வகித்தது வரை பல நினைவுகள் என் நெஞ்சில் நிழலாடுகின்றன.