அரியலூர், பெரம்பலூரில் நாளை முதல்வர் மு.க.ஸ்டாலின் கள ஆய்வு

அரசின் நலத்திட்ட பணிகள் குறித்து அரியலூர், பெரம்பலூர் மாவட்டங்களில் முதல்வர் மு.க.ஸ்டாலின் நாளை கலந்தாய்வு செய்கிறார்.

இதற்காக அவர் இன்று இரவு ஜெயங்கொண்டம் செல்கிறார்.

தமிழகத்தில் மாவட்டங்கள் தோறும் அரசின் நலத்திட்டங்களை மக்களுக்கு சென்றடைகிறதா? என்பது குறித்து நேரில் சென்று முதல்வர் மு.க.ஸ்டாலின் கள ஆய்வு செய்து வருகிறார். முதற்கட்டமாக கோவையில் கடந்த 5, 6ம் தேதிகளில் களஆய்வு மேற்கொண்டு இதனை தொடங்கி வைத்தார். தொடர்ந்து, கடந்த 9, 10 ஆகிய தேதிகளில் விருதுநகர் மாவட்டத்தில் சுற்றுப்பயணம் மேற்கொண்டு அரசின் நலத்திட்ட பணிகள் செயல்பாடு குறித்து கள ஆய்வு செய்தார். பின்னர் அரியலூர், பெரம்பலூர் மாவட்டங்களில் 15ம் தேதி களஆய்வு நடத்தப்படும் என்று முதல்வர் அறிவித்தார்.

இதற்காக சென்னையில் இருந்து விமானம் மூலம் இன்று இரவு (14ம்தேதி) திருச்சி செல்லும் முதல்வர் மு.க.ஸ்டாலினை அமைச்சர்கள் கே.என்.நேரு, அன்பில் மகேஷ், கலெக்டர் பிரதீப்குமார் மற்றும் எம்எல்ஏக்கள், நிர்வாகிகள் வரவேற்கின்றனர். இதைத்தொடர்ந்து அங்கிருந்து காரில் அரியலூர் மாவட்டம் ஜெயங்கொண்டம் சென்று சுற்றுலா மாளிகையில் தங்குகிறார். மறுநாள் காலை (15ம் தேதி) ஜெயங்கொண்டம் அடுத்த மகிமைபுரத்தில் 150 ஏக்கரில் ரூ.1000 கோடி மதிப்பீட்டில் அமைக்கப்படும் சிப்காட் தொழில்பூங்காவுக்கு முதல்வர் மு.க.ஸ்டாலின் அடிக்கல் நாட்டுகிறார்.