மாயமான 6 பேரும் கொலையானதால் பதற்றம் மணிப்பூரில் வன்முறை வெடித்தது

முதல்வரின் மருமகன் வீடும் முற்றுகை, வீதிகளில் அமர்ந்து பெண்கள் போராட்டம், பள்ளிகளுக்கு விடுமுறை கடைகள் அடைப்பு, 144 தடை உத்தரவு மீண்டும் அமல்

மணிப்பூரில் மாயமான 6 பேரின் சடலங்கள் மீட்கப்பட்டன. அவர்களின் கொலைக்கு நீதி கேட்டு 2 பா.ஜ அமைச்சர்கள், 3 எம்எல்ஏக்கள் வீடுகளை போராட்டக்காரர்கள் முற்றுகையிட்டதால் பதற்றம் ஏற்பட்டுள்ளது. மணிப்பூரில் நீடிக்கும் இனக்கலவரத்தின் ஒருபகுதியாக கடந்த திங்கள்கிழமை(11ம் தேதி) ஜிரிபாம் மாவட்டம் போராபெக்ராவின் ஜகுராதோர் கராங் பகுதிக்குள் பயங்கர ஆயுதங்களுடன் நுழைந்த மர்ம நபர்கள் அங்கிருந்த கடைகளை தீ வைத்து எரித்ததுடன், அங்கிருந்த சிஆர்பிஎப் வீரர்கள் முகாம் உள்பட சில வீடுகள் மீதும் தாக்குதல் நடத்தினர்.

அப்போது சிஆர்பிஎப் வீரர்கள் நடத்திய துப்பாக்கி சூட்டில், தீவிரவாதிகள் 11 பேர் கொல்லப்பட்டனர். இதன் தொடர்ச்சியாக மெய்டீஸ் இனத்தை சேர்ந்த 6 மாத குழந்தை உள்பட 3 குழந்தைகள், 3 பெண்களை தீவிரவாதிகள் கடத்தி சென்றதுடன், மெய்டீஸ் இனத்தை சேர்ந்த 2 ஆண்களையும் தீ வைத்து எரித்து கொன்றனர். இதனால் ஜிரிபாம் மாவட்டத்தில் பதற்றம் நீடித்து வந்தது. மாயமான 6 பேரை தேடும் பணி முடுக்கி விடப்பட்டது.