ஆரம்பநிலை சிசு வளர்ச்சியை கண்டறியும் பரிசோதனை திட்டம்

760 ஓமந்தூரார் மருத்துவமனையில் இதுவரை பயனடைந்த கர்ப்பிணிகளின் எண்ணிக்கை | சிசுவின் மரபணுவை ஆராய 'டபுள் மார்க்கர்' மற்றும் 'என்டி' ஸ்கேன் பரிசோதனை

கருவில் குழந்தையின் வளர்ச்சி மற்றும் பிரசவத்திற்கு பிறகு குழந்தையின் நலன் ஆகியவற்றை கருத்தில் கொண்டு முன்கூட்டியே பரிசோதனைகள் மற்றும் சிகிச்சைகள் அளிக்கப்படுகின்றன. குழந்தைக்கு ஏதேனும் உடல்நலக் கோளாறுகள் அல்லது குறைபாடுகள் உள்ளனவா என்பது குறித்து முன்கூட்டியே பரிசோதனை செய்யப்படுவது ஆரோக்கியமான முறையாகும். இதற்காக தமிழ்நாடு அரசு, டாக்டர் முத்துலட்சுமி ரெட்டி மகப்பேறு நிதி உதவித் திட்டத்தின் கீழ் நிதி உதவி, பேறுசார் மற்றும் குழந்தை நல ஒப்புயர்வு மையங்கள், சீமாங்க் மையங்கள் போன்ற பல திட்டங்களை கர்ப்பிணித் தாய்மார்களுக்காக செயல்படுத்தி வருகிறது.

கடந்த 2022ம் ஆண்டு ஆரம்ப நிலை சிசு வளர்ச்சியை கண்டறியும் பரிசோதனை திட்டம் தொடங்கப்பட்டது. இதனையடுத்து தமிழகத்தில் முதல் முறையாக ஓமந்தூரார் அரசு பன்னோக்கு உயர் சிறப்பு மருத்துவமனையில், வெளிநாட்டிலிருந்து பிரத்யேகமாக வரவழைக்கப்பட்ட "ஆட்டோடெல்பியா தாய்வழி பகுப்பாய்வு" (Autodelfia Maternal Analyzer) என்ற மருத்துவக் கருவி ₹1 கோடி செலவில் அமைக்கப்பட்டது. இதனை தமிழக முதல்வர் மு.க.ஸ்டாலின் தொடங்கி வைத்தார். இதன் மூலம் கர்ப்பிணி தாய்மார்களுக்கான ஆரம்ப நிலை கரு வளர்ச்சி குறைபாடுகளை கண்டறிய முடியும். கரு வளர்ச்சி குறித்து பரிசோதனை மேற்கொள்ள ₹1000 கட்டணமாக வசூலிக்கப்படுகிறது. இது மக்களிடையே நல்ல வரவேற்பு பெற்றுள்ளது. இதன் மூலம் கிட்டத்தட்ட 800 பரிசோதனைகள் செய்யப்பட்டுள்ளன.