அயனாவரம் போலீஸ்காரர் கைது

கேரளாவை சேர்ந்தவரிடம் ஆன்லைன் மூலம் போதைப்பொருள் வாங்கி, சென்னையில் விற்பனை செய்த அயனாவரம் சட்டம் ஒழுங்கு காவலரை, நீலாங்கரை போலீசார் கைது செய்தனர்.

சென்னையில் போதைப்பொருட்களின் புழக்கத்தை கட்டுப்படுத்த சென்னை போலீசார் பல்வேறு நடவடிக்கையில் ஈடுபட்டு வருகின்றனர். அதன்படி, போதைப்பொருட்களை சப்ளை செய்யும் முக்கிய நபர்களை கண்டறிந்து, கைது செய்து வருகின்றனர். அந்த வகையில், `தீரன் அதிகாரம் ஒன்று’ திரைப்பட காட்சியை போல், போதைப்பொருள் கும்பலை பெங்களூருவில் வைத்து, தெற்கு மண்டல அதிதீவிர குற்றத்தடுப்பு பிரிவு போலீசார் சில தினங்களுக்கு முன்பு கைது செய்தனர்.

அதன்படி, சென்னையில் மெத்தபெட்டமைன் போதைப்பொருள் விற்பனை செய்பவர்களை தெற்கு மண்டல அதிதீவிர தடுப்புப்பிரிவு போலீசார் தீவிரமாக கண்காணித்து வந்தபோது, தூத்துக்குடி மாவட்டம் உடன்குடியை சேர்ந்த, சென்னையில் சமையல் மாஸ்டராக பணியாற்றும் ரகு என்பவரிடமிருந்து 4 கிராம் மெத்தபெட்டமின் போதைப்பொருளை விற்பனை செய்யும் போது கையும் களவுமாக பிடிபட்டார்.

அவரிடம், போலீசார் விசாரணை மேற்கொண்டபோது திருவண்ணாமலை மாவட்டம், ஆரணியை சேர்ந்த நெசவு தொழிலாளி கண்ணன் என்பவரிடமிருந்து போதைப்பொருளை வாங்கி விற்பனை செய்வதாக அளித்த தகவலின்பேரில் கண்ணனை போலீசார் கைது செய்தனர். பின்னர், கைதான ரகு மற்றும் கண்ணன் உட்பட 3 பேரிடம் போலீசார் நடத்திய விசாரணையில், பல்வேறு திடுக்கிடும் தகவல்கள் வெளியானது. அதில், சில செல்போன் செயலிகளில் பழக்கமான நபர்களிடம் மெத்தபெட்டமைன் போதைப்பொருளை ரகு மற்றும் கண்ணன் ஆகியோர் குறைந்த விலைக்கு வாங்கி, அதனை கூடுதல் விலைக்கு விற்பனை செய்து வந்துள்ளனர்.

குறிப்பாக, கண்ணன் பெங்களூருவில் உள்ள ஒரு கேமரூன் நாட்டவரிடமிருந்து மெத்தபெட்டமைன் போதைப்பொருளை குறைந்த விலைக்கு வாங்கி வந்து, சென்னையில் கூடுதல் விலைக்கு விற்பனை செய்து வருவதும் தெரியவந்தது.