வங்கக்கடலில் நிலை கொண்டுள்ள காற்றழுத்த தாழ்வுப்பகுதி நகர்வதில் சிக்கல்

வங்கக் கடலில் எதிர்த்திசையில் இருந்து வீசும் காற்றின் வேகம் காரணமாக, வங்கக் கடலில் நிலை கொண்டு இருக்கும் காற்றழுத்த தாழ்வுப்பகுதி தமிழக கடலோரப் பகுதிக்கு நெருங்கி வருவதில் தாமதம் ஏற்படுகிறது.

இது படிப்படியாக 19 அல்லது 20ம் தேதி நெருங்கி வரும் என எதிர்பார்க்கப்படுகிறது. இதன் காரணமாக வட தமிழக கடலோரப் பகுதிகளில் ஒரு சில இடங்களில் கனமழை முதல் மிக கனமழை பெய்யும் வாய்ப்புள்ளதாக வானிலை ஆய்வு மையம் கணித்துள்ளது. வங்கக் கடலில் உருவான காற்றழுத்த தாழ்வுப் பகுதி இலங்கைக்கு கிழக்கே நீடித்துக் கொண்டிருக்கிறது.

தற்போது இது நாகப்பட்டினத்துக் கிழக்கே 300 கிமீ தொலைவிலும், சென்னைக்கு 500 கிமீ தொலைவிலும் நிலை கொண்டுள்ளது. இது மேற்கு நோக்கி நகர்வதில் சில பிரச்னைகளை சந்தித்து முன்னும், பின்னும் நகரும் தன்மை கொண்டதாக இருக்கிறது. குறிப்பாக எதிர்த்திசை காற்று 3100 மீட்டர் உயர்த்தில் பயணித்துக் கொண்டு இருக்கும் காரணத்தால், இந்த காற்றழுத்த தாழ்வுப்பகுதி இதற்கு மேல் உயர்ந்து செல்ல வாய்ப்பு இல்லை என்றும் கணிக்கப்பட்டுள்ளது. அதனால் இது தீவிரமடைய முடியாத வகையில் இடையூறுகள் அதிகமாக உள்ளன.