கிறிஸ்தவராக மாறிய ஆதிதிராவிடர்களுக்கும் இடஒதுக்கீடு

மத்திய அரசை வலியுறுத்தி பேரவையில் தீர்மானம்; அதிமுக ஆதரவு-பாஜக வெளிநடப்பு

கிறிஸ்தவராக மதம் மாறிய ஆதிதிராவிடர்களுக்கும் பட்டியலின மக்களுக்கு வழங்கப்படும் சட்டரீதியான பாதுகாப்பு, இடஒதுக்கீடு உள்ளிட்ட சலுகைகள் கிடைக்கச் செய்ய மத்திய அரசை வலியுறுத்தும் தீர்மானம், சட்டப்பேரவையில் புதன்கிழமை நிறைவேற்றப்பட்டது.

இந்தத் தீர்மானத்துக்கு அதிமுக ஆதரவு தெரிவித்த நிலையில், பாஜக எதிர்ப்பு தெரிவித்து வெளிநடப்பு செய்தது.

கிறிஸ்தவராக மதம் மாறிய ஆதிதிராவிடர்களுக்கும் சலுகை கிடைக்கச் செய்வதற்குகளை மத்திய அரசை வலியுறுத்துவதற்கான அரசின் தனித் தீர்மானம், சட்டப்பேரவையில் கொண்டுவரப்பட்டது. கேள்வி நேரத்துக்குப் பிறகு, தனித் தீர்மானத்தை முதல்வர் மு.க.ஸ்டாலின் முன்மொழிந்தார். அப்போது அவர் பேசியதாவது:

ஆதிதிராவிடர்களாக இருந்து மதம் மாறிய பிறகும் தீண்டாமை உள்ளிட்ட ஜாதிய வன்கொடுமைகளுக்கு அவர்கள் உள்ளாவது தொடரவே செய்கிறது. இதைகனிவோடு கவனிக்க வேண்டியவர்களாக இருக்கிறோம். நாட்டின் அரசியல் அமைப்பு சட்டப்படி, ஹிந்து, சீக்கிய, பௌத்த மதங்களைத் தவிர்த்து பிற மதங்களைச் சேர்ந்த யாரும் பட்டியலின வகுப்பைச் சேர்ந்தவர்களாகக் கருதப் படமுடியாது.

ஆதிதிராவிடர் இருக்கும்போது, வரலாற்று ரீதியாக அவர்கள் வகுப்பினராக அவர்களுக்குப் பட்டியலின வகுப்புக்கான உரிமைகளை வழங்குவதே சரியாக இருக்கும். அதன் மூலமாகத் தான் அவர்களுக்கு கல்வி, வேலை வாய்ப்பு ஆகியன கிடைத்து சமூகத்தில் உயர்வும் மேம்பாடும் அடைய முடியும்.

ஜாதிய ஏற்றத்தாழ்வை வைத்து எந்த வகையில் அடக்கி ஒடுக்கினார்களோ, அதே ஜாதியை வைத்தே இடஒதுக்கீடு வழங்கி உயர்வடைய வைக்கும் தத்துவம் தான் சமூகநீதித் தத்துவம்.