ஜூன் 15-இல் கரையைக் கடக்கிறது 'பிபர்ஜாய்'

அதிதீவிர புயலாக மாறியது

அரபிக் கடலில் உருவாகி, அதிதீவிர புயலாக உருமாறியுள்ள ‘பிபா்ஜாய்’, வரும் 15-ஆம் தேதி சௌராஷ்டிரம்-கட்ச் வளைகுடா பகுதியில் கரையைக் கடக்க வாய்ப்புள்ளதாக இந்திய வானிலை ஆய்வு மையம் தெரிவித்துள்ளது.

கிழக்கு மத்திய அரபிக் கடலில் கடந்த 6-ஆம் தேதி உருவாகிய ‘பிபா்ஜாய்’ புயலானது ஞாயிற்றுக்கிழமை காலை நிலவரப்படி, குஜராத்தின் போா்பந்தருக்கு தெற்கு-தென்கிழக்கு திசையில் சுமாா் 480 கி.மீ. தொலைவிலும் துவாரகா நகருக்கு தெற்கு-தென்கிழக்கு திசையில் சுமாா் 530 கி.மீ. தொலைவிலும் நிலைகொண்டிருந்தது.

இந்நிலையில், இந்திய வானிலை ஆய்வு மையம் வெளியிட்ட அறிக்கையில், ‘பிபா்ஜாய் புயலானது ஞாயிற்றுக்கிழமை காலை 5.30 மணியளவில் அதிதீவிரமாக உருமாறியது.

அந்தப் புயலானது குஜராத்தின் மாண்டவி நகருக்கும் பாகிஸ்தானின் கராச்சி நகருக்கும் இடைப்பட்ட பகுதியில் வரும் 15-ஆம் தேதி நண்பகலில் கரையைக் கடக்க வாய்ப்புள்ளது.

கட்ச் வளைகுடா பகுதியில் திங்கள்கிழமை காற்று மணிக்கு 40கி.மீ. முதல் 50கி.மீ. வேகத்திலும் அடுத்தடுத்த நாள்களில் மணிக்கு 55 முதல் 75 கி.மீ. வேகம் வரையிலும் வீச வாய்ப்புள்ளது. புயல் கரையைக் கடக்கும்போது கட்ச் வளைகுடா பகுதியில் தீவிர மழைபெய்ய வாய்ப்புள்ளது. புயல் கரையைக் கடக்கும்போது காற்றின் வேகம் மணிக்கு 135 கி.மீ. வரை அதிகரிக்க வாய்ப்புள்ளது.