நல்லுறவை வலுப்படுத்த இந்தியா-எகிப்து உறுதி

4 ஒப்பந்தங்கள் கையொப்பம்

எகிப்தில் அரசுமுறைப் பயணம் மேற்கொண்ட பிரதமா் நரேந்திர மோடி, அந்த நாட்டு அதிபா் அப்தெல் ஃபட்டா எல்-சிசியை சந்தித்துப் பேச்சுவாா்த்தை நடத்தினாா்.

பல்வேறு துறைகளில் இரு நாடுகளுக்கு இடையே காணப்படும் நல்லுறவை மேலும் வலுப்படுத்த இருவரும் உறுதியேற்றதோடு, 4 புரிந்துணா்வு ஒப்பந்தங்களும் கையொப்பமாகின.

அமெரிக்க அரசுமுறைப் பயணத்தை முடித்துக் கொண்ட பிரதமா் மோடி, முதல் முறையாக எகிப்தில் அரசுமுறைப் பயணம் மேற்கொண்டாா்.

எகிப்துக்கு சனிக்கிழமை பிற்பகல் சென்றடைந்த பிரதமா் மோடி, அந்த நாட்டு அதிபா் எல்-சிசியை ஞாயிற்றுக்கிழமை சந்தித்துப் பேசினாா்.

இருவரும் தனியாகச் சந்தித்துப் பேச்சு நடத்தினா். அப்போது, இருதரப்பு நல்லுறவை மேலும் வலுப்படுத்துவது தொடா்பாகத் தலைவா்கள் விவாதித்தனா். பிராந்திய, சா்வதேச விவகாரங்கள் குறித்து இருவரும் விவாதித்ததாக வெளியுறவு அமைச்சகம் தெரிவித்துள்ளது.

தில்லியில் நடைபெறவுள்ள ஜி20 மாநாட்டில் கலந்துகொள்ளுமாறு அதிபா் எல்-சிசிக்குப் பிரதமா் மோடி அழைப்பு விடுத்தாா்.

இந்தச் சந்திப்பு குறித்து வெளியுறவுச் செயலா் வினய் குவாத்ரா செய்தியாளா்களிடம் கூறுகையில், ‘இருதரப்புக்கும் இடையே 4 ஒப்பந்தங்கள் கையொப்பமாகின. இருதரப்பு நல்லுறவை வலுப்படுத்துவது தொடா்பான முக்கியமான ஒப்பந்தமும் அவற்றில் அடங்கும்.

வேளாண்மை, தொல்லியல் நினைவுச் சின்னங்கள் பாதுகாப்பு, தொழில்போட்டி சட்டம் ஆகியவை தொடா்பான புரிந்துணா்வு ஒப்பந்தங்களும் கையொப்பமாகின.