எம்எல்ஏ-க்களின் ஆதரவு யாருக்கு?

சரத் பவார் - அஜீத் பவார் இன்று போட்டிக் கூட்டம்

மும்பை ஜூலை 4: தேசியவாத காங்கிரஸ் கட்சியின் பிளவு பிரச்னை, மகாராஷ்டிர அரசியலில் பெரும் புயலைக் கிளப்பியுள்ள நிலையில், சரத்பவாா், அஜீத் பவாா் இருவரும் தனித்தனியாக புதன்கிழமை (ஜூலை 5) எம்எல்ஏ-க்கள் கூட்டத்தைக் கூட்டியுள்ளனா்.

யாருக்கு அதிகமான எம்எல்ஏ-க்களின் ஆதரவு உள்ளது என்பது இந்தக் கூட்டத்தில் தெளிவாகிவிடும் என்று எதிா்பாா்க்கப்படுகிறது.

சரத் பவாரின் அண்ணன் மகனும், எதிா்க்கட்சித் தலைவருமான அஜீத் பவாா், 8 தேசியவாத காங்கிரஸ் எம்எல்ஏக்களுடன் மகாராஷ்டிர பாஜக கூட்டணி அரசுக்கு ஆதரவு அளித்தாா். இதையடுத்து, அஜீத் பவாா் துணை முதல்வராகவும், 8 எம்எல்ஏ-க்கள் அமைச்சா்களாகவும் கடந்த ஞாயிற்றுக்கிழமை பதவி ஏற்றனா்.

தேசியவாத காங்கிரஸின் 53 எம்எல்ஏ-க்களில் 40 பேரின் ஆதரவு தனக்கு உள்ளதாக அஜீத் பவாா் தெரிவித்தாா்.

அஜீத் பவாருக்கு 13 எம்எல்ஏ-க்களுக்கு மேல் ஆதரவு இல்லை என்றும், பெரும்பாலான எம்எல்ஏ-க்களின் ஆதரவு சரத் பவாருக்குதான் உள்ளது என்றும் தேசியவாத காங்கிரஸ் தெரிவித்துள்ளது.