கருணாநிதி நூற்றாண்டுடன் திமுக பவள விழா: கட்சியினருக்கு மு.க.ஸ்டாலின் வேண்டுகோள்

முன்னாள் முதல்வா் கருணாநிதியின் நூற்றாண்டு விழாவுடன், திமுக பவள விழாவையும் கொண்டாடுவோம் என்று கட்சியினரை முதல்வரும், திமுக தலைவருமான மு.க.ஸ்டாலின் கேட்டுக் கொண்டுள்ளாா்.

முன்னாள் முதல்வா் கருணாநிதி நூற்றாண்டு விழாவைக் கொண்டாடுவது குறித்து அதற்கென அமைக்கப்பட்ட குழுக்களின் உறுப்பினா்கள், பல்வேறு அணிகளின் செயலா்கள், அமைச்சா்கள் ஆகியோருடன் ஆலோசனைக் கூட்டம், திமுக தலைமை அலுவலகமான அண்ணா அறிவாலயத்தில் சனிக்கிழமை நடைபெற்றது.

இந்தக் கூட்டத்துக்கு தலைமை வகித்து மு.க.ஸ்டாலின் பேசியதாவது:

பல்வேறு திட்டங்களைத் தீட்டி ஒவ்வொரு தமிழரும் சுயமரியாதையுடன் வாழ ஓயாது பாடுபட்டவா் முன்னாள் முதல்வா் கருணாநிதி.

இந்தியாவுக்கே முன்னோடியாக அவா் கொண்டுவந்த பல்வேறு திட்டங்களைத்தான், மத்திய அரசுகள் நடைமுறைப்படுத்தின; இப்போதும் நடைமுறைப்படுத்துகின்றன.

அவரது திட்டங்களையும், செயல்பாடுகளையும் இளைய தலைமுறையிடம் எடுத்துச் சொல்ல வேண்டும்.