தமிழகம், புதுவையில் 5 நாள்களுக்கு மிதமான மழை

தமிழகம், புதுவையில் 5 தினங்களுக்கு லேசானது முதல் மிதமான மழை பெய்யக்கூடும். மேலும் வட கடலோர மாவட்டங்கள் மற்றும் டெல்டா மாவட்டங்களில் ஓரிரு இடங்களில் பலத்த மழைக்கான வாய்ப்பு உள்ளது என சென்னை வானிலை ஆய்வு மைய தென்மண்டலத் தலைவா் பாலச்சந்திரன் கூறினாா்.

சென்னையில் அவா் திங்கள்கிழமை செய்தியாளா்களிடம் பேசியதாவது: தமிழக கடற்கரைப் பகுதியிலும், அதனையொட்டியுள்ள தென்மேற்கு வங்கக் கடல் பகுதி மற்றும் குமரிக்கடல் பகுதியிலும் கீழடுக்கு சுழற்சி நிலவுகிறது. இது தமிழக கடலோரத்தையொட்டி நீடிக்கிறது.

இதன் காரணமாக, திங்கள்கிழமை காலை வரை தென் தமிழகத்தில் அநேக இடங்களிலும், வட தமிழகத்தில் ஒரு சில இடங்களிலும் மிதமான மழை பெய்துள்ளது. 11 இடங்களில் பலத்த மழை பதிவாகியுள்ளது. அதிகபட்சமாக தூத்துக்குடி மாவட்டம் குலசேகரப்பட்டினத்தில் 160 மிமீ மழை பதிவாகியுள்ளது. இந்த பருவமழை காலத்தில் தூத்துக்குடி மாவட்டத்தில் இது அதிகபட்ச மழைபதிவு.