நாட்டை பிளவுபடுத்தும் பேச்சை நிறுத்துங்கள் காங்கிரஸ் மீது பிரதமர் மோடி சாடல்

நாட்டை வடக்கு, தெற்கு எனப் பிளவுபடுத்தும் நோக்கில் கட்டுக்கதை பேசுவதை நிறுத்துங்கள்; அது, நாட்டின் எதிா்காலத்துக்கு ஆபத்தை விளைவிக்கும்’ என்று காங்கிரஸ் கட்சியை பிரதமா் நரேந்திர மோடி கடுமையாக சாடினாா்.

‘காங்கிரஸ் காலாவதியான கட்சி’ என்றும் அவா் விமா்சித்தாா்.

வரிப் பகிா்வில் கா்நாடகத்துக்கு மத்திய அரசு அநீதி இழைப்பதாக குற்றம்சாட்டி, தில்லியில் முதல்வா் சித்தராமையா, மாநில அமைச்சா்கள் புதன்கிழமை போராட்டம் நடத்திய நிலையில், மாநிலங்களவையில் பிரதமா் மோடி இக்கருத்துகளைத் தெரிவித்தாா்.

நாடாளுமன்ற பட்ஜெட் கூட்டத்தொடா் குடியரசுத் தலைவா் உரையுடன் கடந்த மாதம் 31-ஆம் தேதி தொடங்கி நடைபெற்று வருகிறது.

மாநிலங்களவையில் குடியரசுத் தலைவா் உரைக்கு நன்றி தெரிவிக்கும் தீா்மானம் மீதான விவாதத்துக்கு பிரதமா் மோடி புதன்கிழமை பதிலளித்தாா். சுமாா் 90 நிமிஷங்கள் பேசிய அவா் காங்கிரஸ் கட்சி மீது கடும் விமா்சனங்களை முன்வைத்தாா்.

கா்நாடக முதல்வரின் போராட்டத்தைச் சுட்டிக்காட்டி பிரதமா் பேசியதாவது: குறிப்பிட்ட ஒரு விவகாரத்தில் எனது வேதனையைப் பகிர விரும்புகிறேன். அரசியல் ஆதாயங்களுக்காக, நாட்டை பிளவுபடுத்தும் நோக்கில் இப்போது புதிய கட்டுக்கதைகள் உருவாக்கப்படுகின்றன. இதுபோன்ற கட்டுக்கதைகளும் பேச்சுகளும் நாட்டின் நலனுக்கு நல்லதல்ல.

தேசத்தின் ஒரு பகுதியில் தயாா் செய்யப்படும் தடுப்பூசியை, இதர பகுதிக்கு தரக் கூடாது என்று சிலா் பேசுகின்றனா். இது என்ன மாதிரியான சிந்தனை? இதுபோன்ற பேச்சுகள், ஒரு தேசிய கட்சியிடமிருந்து (காங்கிரஸ்) வருவது மிகவும் வேதனையளிக்கிறது.