ஆன்மிக பாதையைப் பின்பற்றி நவீன வளர்ச்சியை ஏற்க வேண்டும் - குடியரசுத் தலைவர் வலியுறுத்தல்

குஜராத், தரம்பூரில் உள்ள ஸ்ரீமத் ராஜ்சந்திர மடத்தில் செவ்வாய்க்கிழமை நடைபெற்ற நிகழ்ச்சியில் பங்கேற்ற குடியரசுத் தலைவர் திரௌபதி முர்மு.

வல்சாத்: ஆன்மிக பாதையை பின்பற்றி நவீன வளர்ச்சியை நாம் ஏற்க வேண்டும்' என்று குடியரசுத் தலைவர் திரௌபதி முர்மு வலியுறுத்தினார்.

"பாரம்பரியத்துக்கு திரும்புவதன் மூலம் உலகின் பல்வேறு பிரச்னைகளுக்கு தீர்வு காண முடியும்' என்றும் அவர் குறிப்பிட்டார்.

குஜராத் மாநிலம், தரம்பூரில் உள்ள ஸ்ரீமத் ராஜ்சந்திர மடத்துக்கு குடியரசுத் தலைவர் திரௌபதி முர்மு செவ்வாய்க்கிழமை வருகை தந்தார். சமண மதத்துடன் தொடர்புடைய இந்த மடத்தில் நடைபெற்ற கூட்டத்தில் அவர் பேசியதாவது:

இன்று பெரும்பாலான மக்கள் பொருள்சார்ந்த இன்பத்தின் பின்னால் ஓடுகின்றனர். அது ஒருபோதும் மகிழ்ச்சியளிக்காது. வாழ்வில் உண்மையில் என்ன தேவை என்பதை அவர்கள் மறந்துவிடுகின்றனர். ஆன்மிகம் சார்ந்த செல்வத்தை நாம் மெதுவாக மறந்து வருகிறோம்.