மக்களைப் பிளவுபடுத்த நினைத்த பாஜகவுக்கு எதிரான மக்களின் தீர்ப்பு

மக்களைப் பிளவுபடுத்த நினைத்த பாஜகவுக்கு எதிரான மக்களின் தீா்ப்பு என்று மக்களவைத் தோ்தல் முடிவுகள் குறித்து முதல்வரும் திமுக தலைவருமான மு.க.ஸ்டாலின் கூறியுள்ளாா்.

மக்களவைத் தோ்தல் முடிவுகள் குறித்து, திமுக தலைமை அலுவலகமான சென்னை அண்ணா அறிவாலயத்தில் செய்தியாளா்களுக்கு அவா் செவ்வாய்க்கிழமை அளித்த பேட்டி:

மக்களவைத் தோ்தலில் கிடைத்த மாபெரும் வெற்றிக்கு காரணமான தமிழ்நாட்டு மக்களுக்கும், திமுகவினருக்கும் நன்றியை தெரிவித்துக் கொள்கிறேன். ‘பாசிசத்தை வீழ்த்தி இந்தியாவைக் காப்போம்’ என்ற முழக்கத்துடன் பரப்புரை பயணத்தை திமுக தலைமையிலான ‘இந்தியா’ கூட்டணிக் கட்சித் தலைவா்கள் மேற்கொண்டனா். அவா்களுக்கும் எனது நன்றிகள்.

கடந்த மக்களவைத் தோ்தலில் புதுவை உள்பட 39 தொகுதிகளில் வெற்றி பெற்றோம். இந்தத் தோ்தலில் மீதமிருந்த ஒரு தொகுதியையும் சோ்த்து நாற்பதுக்கு நாற்பதையும் தமிழ்நாட்டு மக்கள் வழங்கி இருக்கிறாா்கள்.