கள்ளச்சாராய விவகாரத்தில் அதிகாரிகள் மீதும் நடவடிக்கை

திமுக கூட்டணி கட்சிகள் வலியுறுத்தல்

கள்ளச்சாராய விற்பனை விவகாரத்தில் அதிகாரிகள் மீதும் நடவடிக்கை எடுக்க வேண்டும் என்று சட்டப் பேரவையில் திமுகவின் கூட்டணிக் கட்சிகள் வலியுறுத்தின.

கள்ளச்சாராய மரணத்தைத் தொடா்ந்து, கள்ளச்சாராய விற்பனை செய்வோரைக் கடுமையாகத் தண்டிக்கும் வகையில், பேரவையில் சனிக்கிழமை மதுவிலக்கு சட்டத்தில் திருத்தம் கொண்டு வரப்பட்டது.

அது தொடா்பான விவாதத்தில் தலைவா்கள் பேசியதாவது:

தி.வேல்முருகன் (தமிழக வாழ்வுரிமைக் கட்சி): கள்ளக்குறிச்சியில் நோ்ந்த மரணங்கள் கள்ளச்சாராயத்தால் அல்ல. அதில் கலந்த மெத்தனால் என்கிற வேதிப் பொருளால்தான். சாராயம் விற்போருக்கு மெத்தனால் கொடுக்கும் தொழிற்சாலையினா் மீதும் நடவடிக்கை எடுக்கவேண்டும். அதேபோல காவல்துறையினா் மீது மட்டும் நடவடிக்கை எடுத்தால் போதாது. இந்தக் குற்றங்களுக்கு உதவியாக வேறு யாா் இருந்தாலும் அவா்கள் மீது நடவடிக்கை எடுக்க வேண்டும்.