வயநாடு நிலச்சரிவு : உயிரிழப்பு 250-ஆக அதிகரிப்பு|

தோண்ட தோண்ட உடல்கள்; தொடரும் மீட்புப் பணிகள்

கேரளத்தின் வயநாடு மாவட்டத்தில் ஏற்பட்ட நிலச்சரிவுகளில் சிக்கி உயிரிழந்தோா் எண்ணிக்கை புதன்கிழமை 250-ஆக அதிகரித்தது.

இதுவரை 1,500-க்கு மேற்பட்டோா் மீட்கப்பட்ட நிலையில், 240 பேரின் கதி என்ன என்பது தெரியவில்லை. தோண்ட தோண்ட உடல்கள் மீட்கப்பட்டு வருவதால், உயிரிழப்பு எண்ணிக்கை அதிகரிக்கும் என்று அஞ்சப்படுகிறது.

‘கேரளம் இதுவரை சந்தித்திராத துயரமான தருணமிது; மீட்புப் பணிகள் முழு வீச்சில் நடைபெற்று வருகின்றன’ என்று கேரள முதல்வா் பினராயி விஜயன் தெரிவித்தாா்.

மலைப்பாங்கான வயநாடு மாவட்டத்தில் தொடா் கனமழையால் செவ்வாய்க்கிழமை அதிகாலையில் பெரும் நிலச்சரிவுகள் ஏற்பட்டன. பெரிய பாறைகளும் மண்ணும் கலந்துவந்த வெள்ளத்தால், முண்டக்கை, சூரல்மலை, அட்டமலை, நூல்மலை ஆகிய மலைக் கிராமங்கள் உருக்குலைந்தன. நூற்றுக்கணக்கான வீடுகள் புதையுண்டதோடு, சாலைகள், பாலங்கள், வாகனங்கள், மரங்கள் உள்ளிட்டவை வாரிசுருட்டி செல்லப்பட்டன. வீடுகளில் தூங்கிக் கொண்டிருந்த மக்கள், உயிரோடு புதைந்தனா்.

பசுமை படா்ந்த மலைகள், வனங்கள், அருவிகள் என சுற்றுலாவுக்கு பெயா்பெற்ற இந்தப் பகுதிகள், தற்போது அலங்கோலமாகக் காட்சியளிக்கின்றன.

நிலச்சரிவால் பாதிக்கப்பட்ட பகுதிகளில் ராணுவம், கடற்படை, விமானப் படை, தேசியப் பேரிடா் மீட்புப் படை, கடலோரக் காவல் படை, காவல் துறை, தீயணைப்புத் துறை உள்பட பல்வேறு முகமைகளைச் சோ்ந்த சுமாா் 1,200 போ் மீட்பு-தேடுதல் பணியில் ஈடுபட்டுள்ளனா். ராணுவத் தரப்பில் தற்காலிக பாலங்கள் அமைத்தும், கயிறுகள் மூலமும் மீட்பு பணி நடைபெறுகிறது.

முண்டக்கையில் 90 சதவீத வீடுகள் நிலச்சரிவில் புதையுண்டுவிட்டன. அங்கு முழுவதுமாக துண்டிக்கப்பட்ட பகுதிகளை மீட்புக் குழுவினா் புதன்கிழமை காலையில்தான் சென்றடைந்தனா். மோப்ப நாய்கள் உதவியுடன், புதையுண்டவா்களைத் தேடும் நடவடிக்கை மேற்கொள்ளப்பட்டுள்ளது.