மத்தியில் நிலையான ஆட்சிக்கு பங்களித்தவர் கருணாநிதி

கட்சி, சித்தாந்த கோட்பாடுகளைத் தாண்டி, மத்தியில் வாஜ்பாய் தலைமையிலான பாஜக ஆட்சிக்கு ஆக்கபூர்வ பங்களிப்பைத் தந்தவர் முன்னாள் முதல்வர் கருணாநிதி என்று பாதுகாப்புத் துறை அமைச்சர் ராஜ்நாத் சிங் புகழாரம் சூட்டினார்.

முன்னாள் முதல்வர் கருணாநிதியின் நூற்றாண்டு நிறைவையொட்டி, அவரது உருவம் பொறித்த நாணயம் வெளியிடும் நிகழ்ச்சி சென்னை கலைவாணர் அரங்கத்தில் ஞாயிற்றுக்கிழமை மாலையில் நடைபெற்றது.

விழாவில், மத்திய அமைச்சர் ராஜ்நாத் சிங் நாணயத்தை வெளியிட, முதல்வர் மு.க.ஸ்டாலின் பெற்றுக் கொண்டார்.

விழாவில் ராஜ்நாத் சிங் பேசியது: மாநில எல்லையைத் தாண்டி ஆதிக்கம் செலுத்தியவர் கருணாநிதி. சமூக நீதியின் காவலராகத் திகழ்ந்த அவரின், மக்கள் நலன்சார்ந்த பங்களிப்பால் தமிழ் நாடு மட்டுமல்ல, ஒட்டுமொத்த இந்தியாவே பயன்பெற்றது. அவரது தொலைநோக்குப் பார்வை, செயல்பாடுகள் அனைத்தும் ஜனநாயகத்தின் மீதும், வளர்ச்சியை மையப்படுத்தியுமே இருந்தன.

தேசிய முகம்: ஐந்து முறை முதல்வராக இருந்து, சாதாரண, சாமானிய மக்களின் தேவைகளை நிறைவேற்றினார். சீறும் அலைகளை கொண்ட இந்திய அரசியல் எனும் கடலில் கருணாநிதி ஒரு மாநிலத் தலைவராக மட்டுமல்லாது, தேசிய முகமாகவும் திகழ்ந்தவர். தேசிய அரசியலில் பங்கெடுத்தவர். குறிப்பாக, கூட்டணி ஆட்சி யில் அவரது பங்கு முக்கியத்துவம் வாய்ந்தது. அரசியல் கட்சிகளைத் தாண்டி அனைத்துத் தலைவர்களிடமும் உரையாடுபவராக இருந்தார்.

இந்திய ஜனநாயகத்தில் அவர் மிகுந்த நம்பிக்கை கொண்டிருந்தார். மாநில உரிமைகளை வலியுறுத்தியதுடன், அதிகாரங்கள் சரி சமமாகப் பகிரப்பட வேண்டும் என்பதில் உறுதியாக இருந்தார். நம்மிடையே உள்ள வேறுபாடுகள் மதிக்கப்படுவதுடன், மக்களுக்காக இணைந்து உழைப்பதில் ஒன்றுபட்டு நிற்க வேண்டும் என்ற பதில் உறுதிப்பாடு கொண்டிருந்தார்.

1960-களில் தலைவராக உருவெடுத்தார் கருணாநிதி. அப்போது, பஞ்சாபில் இருந்து தமிழ் நாடு உள்பட பல்வேறு மாநிலங்களில் கட்சிகள் உருவாகின. அந்தக் கட்சிகள் மாயமான நிலையில், கருணாநிதி போட்ட வலுவான அடித்தளத்தில் இப்போது வரை திமுக ஆட்சியில் இருக்கிறது.

அரசியல் கட்சிகள், வெவ்வேறு சிந்தனைகளைக் கொண்டவர்கள் இருந்தாலும், அனைவரும் இணைந்து நிலையான ஆட்சி யைத் தர முடியும் என்பதை நிரூபித்துக் காட்டியவர் கருணாநிதி.