மருத்துவர்களின் பாதுகாப்பு: ஒரு வாரத்துக்குள் நடவடிக்கை

மத்திய, மாநில அரசுகளுக்கு உச்சநீதிமன்றம் கெடு

மருத்துவர்களின் பாதுகாப்பை உறுதிப்படுத்துவதற்கான நடவடிக்கைகளை ஒரு வாரத்துக்குள்ளாக நிறைவு செய்ய வேண்டும் என்று மத்திய, மாநில அரசுகளுக்கு உச்சநீதிமன்றம் வியாழக்கிழமை உத்தரவிட்டது.

மேலும், பெண் பயிற்சி மருத்துவர் பாலியல் கொலை விவகாரத்தில் வழக்குப் பதிவு செய்வதில் கொல்கத்தா போலீஸார் செய்துள்ள தாமதம் மிகுந்த கவலையளிப்பதாகக் குறிப்பிட்ட உச்சநீதி மன்றம், போராட்டத்தில் ஈடுபட்டுவரும் மருத்துவர்கள் பணிக்குத்திரும்ப அறிவுறுத்தியது.

மேற்கு வங்க மாநிலம், கொல்கத்தாவில் உள்ள அரசு மருத்துவக் கல்லூரி மருத்துவமனையில் முதுநிலை பெண் பயிற்சி மருத்துவர் கடந்த 9-ஆம் தேதி பாலியல் வன்கொடுமை செய்யப்பட்டு கொலை செய்யப்பட்டார்.

கொல்கத்தா உயர்நீதிமன்ற உத்தரவைத் தொடர்ந்து, இந்த வழக்கை சிபிஐ விசாரித்து வருகிறது. இந்த சம்பவம் நாடு முழுவதும் மருத்துவர்கள் போராட்டத்துக்கு வழிவகுத்தது.

இந்த சம்பவம் தொடர்பாக உச்ச நீதிமன்றத் தலைமை நீதிபதி டி.ஒய். சந்திரசூட், ஜே.பி.பார்திவாலா, மனோஜ் மிஸ்ரா ஆகியோர் அடங்கிய அமர்வு தாமாக முன்வந்து விசாரணை செவ்வாய்க்கிழமை மேற்கொண்டது.

அப்போது, 'பெண் மருத்துவர் படுகொலை செய்யப்பட்ட சம்பவம் நாடு முழுவதும் மருத்துவர்களின் பாதுகாப்பு தொடர்பாக அமைப்பு ரீதியான பிரச்னையை எழுப்புகிறது' என்று குறிப்பிட்ட நீதிபதிகள், மருத்துவர்களின் பாதுகாப்பை உறுதி செய்வதற்கான விதிமுறைகளை வகுக்க 10 பேர் கொண்ட தேசிய பணிக்குழுவை அமைத்து உத்தரவிட்டனர்.

உடனடி நடவடிக்கை: இந்த வழக்கு உச்சநீதிமன்றத் தலைமை டி.ஒய்.சந்திரசூட் தலைமையிலான அமர்வில் வியாழக்கிழமை மீண்டும் விசாரணைக்கு வந்தது. பின்னர், நீதிபதிகள் பிறப்பித்த உத்தரவு விவரம்: மருத்துவர்களின் பாதுகாப்பை உறுதிப்படுத்துவது தொடர்பாக உச்சநீதிமன்றம் சார்பில் அமைக்கப்பட்டுள்ள தேசிய பணிக்குழு, அனைத்துத் தரப்பினரிடமும் கருத்துகளைக் கேட்டு அறிக்கை சமர்ப்பிக்க உள்ளது. நாடு முழுவதும் உறைவிட மருத்துவர்களுக்கு 36 முதல் 46 மணிநேரம் வரை தொடர் பணி வழங்குவது மனிதாபிமான மற்றது. இந்தப் பணி நேரத்தை முறைப்படுத்துவது தேசிய பணிக்குழு ஆராயும். அதன் அறிக்கையின் அடிப்படையில் தேவையான உத்தரவுகள் பிறப்பிக்கப்படும்.