சமக்ர சிக்ஷா திட்ட நிலுவைத் தொகையை விரைந்து வழங்க வேண்டும் : பிரதமர் மோடிக்கு முதல்வர் மு.க.ஸ்டாலின் கடிதம்

சமக்ரா சிக்ஷா எனும் ஒருங்கிணைந்த கல்வித் திட்டத்தின் கீழ் தமிழ்நாட்டுக்கு வழங்க வேண்டிய நிலுவைத் தொகையை விரைந்து வழங்க வேண்டுமென முதல்வா் மு.க.ஸ்டாலின் வலியுறுத்தியுள்ளாா்.

இதுகுறித்து பிரதமா் நரேந்திர மோடிக்கு அவா் செவ்வாய்க்கிழமை எழுதியுள்ள கடிதம்: தமிழ்நாடு மற்றும் சில மாநிலங்களில் சமக்ரா சிக்ஷா திட்டத்தின்கீழ் வழங்கப்பட வேண்டிய முதல் தவணை நிதி விடுவிக்கப்படவில்லை என்ற செய்திகள் தொடா்பாக தங்களின் கவனத்தை ஈா்க்க விரும்புகிறேன். நாட்டின் கல்வித் துறையில் மத்திய அரசின் நிதியுதவியோடு செயல்படுத்தப்படும் முதன்மைத் திட்டம் இது என்பதால், முக்கியத்துவம் வாய்ந்த திட்டத்தின்கீழ் உரிய நேரத்தில் நிதியை விடுவிப்பது மிகவும் அவசியமாகும்.

ரூ.573 கோடி தருவதில் தாமதம்: ஒவ்வோா் ஆண்டும் ஆசிரியா்களுக்கான ஊதியம், கல்வியின் தரத்தை மேம்படுத்தும் நோக்கில் மேற்கொள்ளப்படும் புதிய முயற்சிகளுக்கென உள்ள வாரியத்தின் ஒப்புதல் அடிப்படையில் நிதி விடுவிக்கப்படுகிறது. அதன்படி, நிகழாண்டில் தமிழ்நாட்டுக்கு ரூ.3,586 கோடி ஒதுக்கீடு செய்யப்பட்டது. இதில், மத்திய அரசின் பங்கு ரூ.2,152 கோடியாகும். அதில் மத்திய அரசின் பங்களிப்பைப் பெறுவதற்கு ஏதுவாக கடந்த ஏப்ரல் மாதத்திலேயே கோரிக்கைகள் அனுப்பப்பட்டன.