ஜம்மு-காஷ்மீர் முதல்வரானார் ஒமர் அப்துல்லா

துணை முதல்வர் சுரீந்தர் சௌதரி, 4 அமைச்சர்களும் பதவியேற்பு

ஜம்மு-காஷ்மீர் யூனியன் பிரதேசத்தின் முதலாவது முதல்வராக தேசிய மாநாட்டுக் கட்சி துணைத் தலைவர் ஒமர் அப்துல்லா புதன்கிழமை பதவியேற்றார். அவருடன், துணை முதல்வராக நியமிக்கப்பட்டுள்ள சுரீந்தர் சௌதரி மற்றும் 4 அமைச்சர்களும் பதவியேற்றனர்.

ஜம்மு-காஷ்மீர் யூனியன் பிரதேசத்தில் மொத்தமுள்ள 90 தொகுதிகளுக்கு மூன்று கட்டங்களாக (செப்.18, 25, அக்.1) பேரவைத் தேர்தல் நடத்தப்பட்டது. 10 ஆண்டுகளுக்கு பிறகான பேரவைத் தேர்தல் என்பதோடு, கடந்த 2019-இல் ஜம்மு-காஷ்மீருக்கான சிறப்பு அந்தஸ்து ரத்து செய்யப்பட்டு, இரு யூனியன் பிரதேசங்களாக (ஜம்மு-காஷ்மீர், லடாக்) பிரிக்கப்பட்ட பிறகு நடந்த முதல் பேரவைத் தேர்தல் இதுவாகும்.

துணைநிலை ஆளுநரால் நியமிக்கப்படும் 5 எம்எல்ஏக்களையும் சேர்த்து, ஜம்மு-காஷ்மீர் பேரவையின் மொத்த பலம் 95 என்ற நிலையில், தேர்தலில் தேசிய மாநாடு கட்சி-காங்கிரஸ்-மார்க்சிஸ்ட் கூட்டணி 49 தொகுதிகளில் வெற்றி பெற்றது. 42 இடங்களுடன் தேசிய மாநாட்டுக் கட்சி தனிப்பெரும் கட்சியாக உருவெடுத்தது. காங்கிரஸ் 6 இடங்களிலும், மார்க்சிஸ்ட் ஓரிடத்திலும் வென்றன. இதையடுத்து, முதல்வராக ஒமர் அப்துல்லா தேர்வு செய்யப்பட்டார். அவருக்கு 4 சுயேச்சைகள் மற்றும் ஆம் ஆத்மி எம்எல்ஏ ஒருவரும் ஆதரவு தெரிவித்தனர்.