பிளவு அரசியல், திராவிட மாடல்- இரு எதிரிகள்

‘பிளவு அரசியல் செய்பவர்களும், திராவிட மாடல் என்கிற பெயரில் மக்கள்வி ரோத ஆட்சி நடத்திக்கொண்டிருக்கிற ஊழல் சக்திகளும்தான் தமிழக வெற்றிக் கழகத்தின் இரு எதிரிகள்’ என்று அக்கட்சித் தலைவர் விஜய் கூறினார்.

அதேவேளையில் இந்த மண்ணின் இரு கண்களான திராவிடம், தமிழ் தேசியத்தை பிரித்துப் பார்க்கப்போவதில்லை எனவும் அவர் தெரிவித்தார்.

தமிழக வெற்றிக் கழகத்தின் முதல் மாநில மாநாடு வெற்றிக் கொண்டாட்டமாக (கொள்கை பிரகடனம்) விழுப்புரம் மாவட்டம், விக்கிரவாண்டி அருகேயுள்ள வி.சாலையில் ஞாயிற்றுக்கிழமை மாலை நடைபெற்றது. லட்சக்கணக்கான கட்சித் தொண்டர்கள் பங்கேற்ற இந்த மாநாட்டில் விஜய் பேசியதாவது:

அரசியலுக்கு நாம் குழந்தைதான். ஆனாலும், ஒரு பாம்புக்கு நிகரான அரசியலை கையில் எடுத்திருக்கிறோம். கவனத்துடன் களமாடு வேண்டும்.

தற்போதைய தலைமுறைக்கு ஏற்ற வகையில் கொள்கையைச் செயல்படுத்த வேண்டும். ஏற்கெனவே அரசியல் களத்தில் உள்ளவர்கள் குறித்துப் பேசி நேரத்தை வீணடிக்கக்கூடாது. தேவையை உணர்ந்து மக்களுக்குச் சொல்ல வேண்டியதுதான் நமது கடமை.

வசிக்க ஒரு வீடு, வயிற்றுக்கு உணவு, வருமானத்துக்கு ஒரு வேலை- எளிமையாகச் சொல்வதென்றால் எல்லோருக்கும் எல்லாம் என்பதுதான் நமது கட்சியின் நோக்கம்.

நெருப்பாக... பெரியார், அண்ணா, காமராஜர், அம்பேத்கர், வேலுநாச்சியார், அஞ்சலையம்மாள் ஆகியோரைக் கொள்கைத்தலைவர்களாகக் கொண்டு கட்சியின் தொண்டர்கள் செயல்பட வேண்டும். கொள்கையிலும், கோட்பாடுகளிலும் சமரசமின்றி செயல்பட வேண்டும். அதுவரை நாம் நெருப்பாகத்தான் இருக்க வேண்டும்.

ஜாதி, மத அரசியல்: தமிழகத்தில் சமூகநீதியின் அளவுகோலாக மட்டுமே ஜாதி இருக்கும். ஜாதி, மதத்தை வைத்து தமிழகத்தில் யாரும் அரசியல் செய்துவிட முடியாது என்பதை அரசியல் ரீதியாக காலம் காலமாக மக்கள் நிரூபித்திருக்கிறார்கள்.