பொது சிவில் சட்டத்தில் பழங்குடியினருக்கு விலக்கு

ஜார்க்கண்ட் மாநிலத்தில் பாஜக ஆட்சிக்கு வந்தால் பொது சிவில் சட்டம் அமல்படுத்தப்படும்; ஆனால், பழங்குடியின சமூகத்தினருக்கு அதிலிருந்து விலக்கு அளிக்கப்படும் என்று மத்திய உள்துறை அமைச்சர் அமித்ஷா ஞாயிற்றுக்கிழமை அறிவித்தார்.

ஜார்க்கண்டில் நடைபெறவுள்ள சட்டப் பேரவைத் தேர்தலுக்கான பாஜகவின் தேர்தல் அறிக்கையை வெளியிட்ட அமித் ஷா, 'ஏழை மற்றும் பிற்படுத்தப்பட்ட சமூகத்தைச் சேர்ந்த பெண்களுக்கு ஆரம்பக் கல்வி முதல் கல்லூரி வரை இலவசமாக வழங்கப்படும்' என்றும் தெரிவித்தார்.

ஜார்க்கண்டில் 81 இடங்களைக் கொண்ட அந்த மாநில சட்டப் பேரவைக்கு வரும் 13, 20-ஆகிய தேதிகளில் இருகட்டங்களாக தேர்தல் நடைபெறுகிறது. இதில் ஆளும் ஜார்க்கண்ட் முக்தி மோர்ச்சா (ஜேஎம்எம்), காங்கிரஸ் அடங்கிய கூட்டணிக்கும் எதிர்க்கட்சியான பாஜக தலைமையிலான கூட்டணிக்கும் கடும் போட்டி நிலவுகிறது.

இந்நிலையில், ராஞ்சியில் ஞாயிற்றுக்கிழமை நடைபெற்ற நிகழ்ச்சியில் பாஜகவின் தேர்தல் அறிக்கையை மத்திய அமைச்சர் அமித் ஷா வெளியிட்டுப் பேசியதாவது: ஜார்க்கண்டில் பாஜக ஆட்சி அமைத்தால் பொது சிவில் சட்டம் (யுசிசி) அறிமுகப்படுத்தப்படும்.