வடமொழியைப் பழிக்கும் வரியைப் பாடலாமா?

தமிழ்த்தாய் வாழ்த்தில் உள்ள ஏழு வரிகளில் ‘வதனம், திலகம், தெக்கணம், வாசனை’ போன்ற சொற்கள் எல்லாமே ஆரிய மொழியாகிய சம்ஸ்கிருத மொழிச்சொற்கள்தாம். இத்தனை சம்ஸ்கிருத வார்த்தைகள் காணப்படும்போது, சம்ஸ்கிருத மொழியை, ‘உலக வழக்கொழிந்த மொழி’ என்று எப்படிச் சொல்ல முடியும்?

தமிழக ஆளுநர் தலைமையில் சென்னை தூர்தர்ஷனில் நடைபெற்ற ஹிந்தி வார விழாவில் பாடப்பட்ட ‘தமிழ்த்தாய் வாழ்த்துப்’ பாடலில் ‘திராவிட நல் திருநாடு’ என்ற சொற்கள் நீக்கப்பட்டதற்குக் கடுமையான கண்டனத்தைத் தமிழக அரசு தெரிவித்தது. இதில் உள்நோக்கம் இல்லை என்றும், தற்செயலாக நடந்த நிகழ்வு என்றும் தூர்தர்ஷன் மன்னிப்புக் கேட்டு விளக்கமும் அளித்தது. ஆனால், சர்ச்சை இன்னும் நின்றபாடில்லை.

1901 மே 24 அன்று பாலவனத்தம் பொ. பாண்டித்துரைத் தேவரால் மதுரையில் நான்காம் தமிழ்ச்சங்கம் தோற்றுவிக்கப்பட்டது. இதைத் தொடர்ந்து தஞ்சை தமிழ்ச்சங்கம் சாமிநாதனார் தலைமையிலும், 1911 மே 14 அன்று கரந்தைத் தமிழ்ச்சங்கம் நாவலர் ந.மு.வேங்கடசாமி நாட்டார் முன்னிலையிலும் தொடங்கப்பட்டன. கரந்தைத் தமிழ்ச்சங்கத்தின் தலைவராக இருந்தவர் உமா மகேஸ்வரனார்.

கரந்தைத் தமிழ்ச்சங்கம் தொடங்கப் பெற்ற இரண்டாம் ஆண்டு முதல், மனோன்மணீயம் சுந்தரம் பிள்ளை இயற்றிய ‘நீராருங் கடலுடுத்த’ என்னும் பாடல் சங்கத்தின் எல்லா நிகழ்ச்சிகளிலும் ஒலிக்கத் தொடங்கியது. இந்தப் பாடலை முதன்முதலில் மேடையில் பாடியவர் கூடலூர் வே.இராமசாமி. தமிழ்த்தாய் வாழ்த்துக்கு 100 ஆண்டுகளுக்கும் மேலான வரலாறு உண்டு.

1967-இல் முதல்வராகப் பொறுப்பேற்ற அண்ணாதுரை, தமிழ்நாட்டில் நடைபெறும் அரசு விழாக்கள், கல்லூரி, பள்ளி விழாக்கள் அனைத்திலும் பாடக் கூடிய ‘தமிழ்த்தாய் வாழ்த்துப் பாடல்’ ஒன்றைத் தேர்ந்தெடுப்பதற்காகத் தமிழறிஞர்களைக் கூட்டி ஆலோசனை நடத்தினார்.

புலவர் குழு விவாதத்தின்போது தாயுமானவர் இயற்றிய ‘அங்கிங்கு எனாதபடி எங்கும் பிரகாசமாய்’ என்ற பாடல் அல்லது திருக்குறளின் முதல் அதிகாரத்தை முழுவதுமாகப் பாடலாம் என விவாதிக்கப்பட்டது. தாயுமானவர் பாடல் ஹிந்து மதத்தைச் சார்ந்தது என்பதால், மற்ற மதத்தினர் அதை எதிர்த்தனர். திருக்குறளின் கடவுள் வாழ்த்திலும் ‘தாள்’, ‘அடி’ என்பது போன்ற சொற்கள் உருவ வழிபாட்டைக் குறிப்பதால் அதற்கும் எதிர்ப்பு எழுந்தது என்று புலவர் குழுத் தலைவர் அப்பாதுரையாரின் அறிக்கையில் குறிப்பிடப்பட்டுள்ளது.

நிறைவாக, சிறந்த இரு பாடல்களாக மனோன்மணீயம் சுந்தரம் பிள்ளை இயற்றிய ‘நீராருங் கடலுடுத்த’ பாடலும், கரந்தைக் கவியரசு வெங்கடாசலம் பிள்ளை இயற்றிய ‘வானார்ந்த பொதியின்மிசை வளர்கின்ற மதியே’ என்ற பாடலும் பரிந்துரைக்கப்பட்டன.