ஜம்மு-காஷ்மீருக்கு மீண்டும் சிறப்பு அந்தஸ்து: பேரவையில் தீர்மானம் நிறைவேற்றம்

ஜம்மு-காஷ்மீரின் சிறப்பு அந்தஸ்தை மீட்டெடுப்பதற்காக மத்திய அரசுடன் பேச்சுவார்த்தை நடத்த வேண்டும் என்று அந்த யூனியன் பிரதேசத்தின் சட்டப்பேரவையில் புதன்கிழமை தீர்மானம் நிறைவேற்றப்பட்டது.

தீர்மானத்தின் நகலை கிழித்தெறிந்து, பேரவைத் தலைவருக்கு எதிராகக் கோஷங்கள் எழுப்பி பாஜக எம்எல்ஏக்கள் கடும் அமளியில் ஈடுபட்டதால், அவை நடவடிக்கைகள் அவ்வப்போது தடைப்பட்டது.

அரசமைப்புச் சட்டத்தின் 370-ஆவது பிரிவு மூலம் ஜம்மு-காஷ்மீருக்கு வழங்கப்பட்ட சிறப்பு அந்தஸ்தை மத்திய அரசு கடந்த 2019-ஆம் ஆண்டு ஆகஸ்ட் மாதம் 5-ஆம் தேதி ரத்து செய்தது. மாநிலமாக இருந்த பிராந்தியம், ஜம்மு-காஷ்மீர், லடாக் ஆகிய இரு யூனியன் பிரதேசங்களாகப் பிரிக்கப்பட்டது.

இந்நிலையில், ஜம்மு-காஷ்மீர் சட்டப்பேரவைக்கு கடந்த செப்டம்பர்-அக்டோபரில் மூன்று கட்டங்களாக நடைபெற்ற பேரவைத் தேர்தலில் தேசிய மாநாட்டுக் கட்சி-காங்கிரஸ் கூட்டணி ஆட்சியைக் கைப்பற்றியது. ஒமர் அப்துல்லா முதல்வரானார்.