பயங்கரவாதத்துக்கு எதிராக ஒருங்கிணைப்பு

மாநில அரசுகளுக்கு அமித் ஷா வேண்டுகோள்

பயங்கரவாதத்துக்கு எதிரான செயல்பாட்டில், மத்திய- மாநில அரசுகள் இடையே நெருக்கமான ஒருங்கிணைப்பு அவசியம்; கூட்டு வியூகங்களை வகுப்பதோடு, உளவுத் தகவல் பகிர்விலும் ஒருங்கிணைப்பை உறுதி செய்ய வேண்டும் என்று மத்திய உள்துறை அமைச்சர் அமித் ஷா வேண்டுகோள் விடுத்தார்.

தில்லியில் வருடாந்திர பயங்கரவாத எதிர்ப்பு மாநாடு வியாழக்கிழமை தொடங்கியது. இரண்டு நாட்கள் நடைபெறும் இந்த மாநாட்டில் அனைத்து மாநிலங்கள் மற்றும் யூனியன் பிரதேசங்களின் காவல் துறை உயரதிகாரிகள், சட்டம், தடயவியல், தொழில்நுட்பத் துறை நிபுணர்கள் மற்றும் பயங்கரவாத எதிர்ப்பு முகமைகளின் உயரதிகாரிகள் உள்ளிட்டோர் பங்கேற்றுள்ளனர்.

மாநாட்டின் தொடக்க அமர்வில் பங்கேற்ற மத்திய உள்துறை அமைச்சர் அமித் ஷா, சிறந்த பணிக்காக தேசிய புலனாய்வு முகமை (என்ஐஏ) அதிகாரிகள் 11 பேருக்கு பதக்கங்கள் வழங்கி கௌரவித்தார். மாநிலங்கள் மற்றும் யூனியன் பிரதேசங்களுக்கான மாதிரி பயங்கரவாத தடுப்புப் படை (ஏடிஎஸ்) மற்றும் மாதிரி சிறப்புப்பணிக்குழு (எஸ்டிஎஃப்) தொடர்பான தொலைநோக்குப் பார்வையையும் வெளியிட்டு, அவர் பேசியதாவது: