விருதுநகர் பட்டாசு ஆலையில் முதல்வர் ஸ்டாலின் ஆய்வு

விருதுநகர், நவ. 9: விருதுநகர் மாவட்டம், கன்னிசேரிபுதூரில் உள்ள தனியார் பட்டாசு ஆலையில் முதல்வர் மு.க. ஸ்டாலின் சனிக்கிழமை ஆய்வு மேற்கொண்டார்.

விருதுநகரில் ஞாயிற்றுக்கிழமை நடைபெறவுள்ள மாவட்ட ஆட்சியரக புதிய கட்டடம் திறப்பு விழா, நலத்திட்ட உதவிகள் வழங்கும் விழா உள்ளிட்ட நிகழ்ச்சிகளில் பங்கேற்கவும், கள ஆய்வுகள் மேற்கொள்ளவும் இரு நாள்கள் பயணமாக முதல்வர் மு.க. ஸ்டாலின் சனிக்கிழமை பிற்பகல் விருதுநகர் வந்தார்.

முதல் நிகழ்வாக, விருதுநகரை அடுத்த கன்னிசேரிபுதூரில் உள்ள தனியார் பட்டாசு ஆலையில் முதல்வர் ஆய்வு மேற்கொண்டார். பட்டாசு ஆலையின் உரிமம், மூலப்பொருள்கள் வைப்பறை, பட்டாசுக்களைப் பாதுகாக்கும் அறை உள்ளிட்டவற்றை அவர் பார்வையிட்டார்.

அப்போது, அனைத்து பட்டாசு ஆலைகளிலும் பசுமையான சூழலைப் பராமரிக்கவும், பாதுகாப்பு கட்டமைப்பு வசதிகளை வலுப்படுத்தவும் வேண்டும் என முதல்வர் அறிவுறுத்தினார். பட்டாசு ஆலைத் தொழிலாளர்களின் பாதுகாப்புக்கு முறையான காப்பீடு வசதி ஏற்படுத்திட வேண்டும் எனவும் ஆலை உரிமையாளரிடம் அறிவுறுத்தினார்.