நடிகர் டெல்லி கணேஷ் காலமானார்

தமிழ்த் திரையுலகின் மூத்த கலைஞர் டெல்லி கணேஷ் (80) உடல்நலக்குறைவு காரணமாக சென்னையில் சனிக்கிழமை (நவ. 9) இரவு காலமானார்.

கடந்த சில நாள்களாகவே உடல்நலக்குறைவால் பாதிக்கப்பட்டிருந்த டெல்லி கணேஷ், சென்னை ராமாபுரத்தில் உள்ள அவரது இல்லத்தில் ஓய்வெடுத்து வந்த நிலையில் காலமானார்.

இன்று இறுதிச் சடங்கு: டெல்லி கணேஷ் மறைவுக்கு நடிகர்கள் ரஜினிகாந்த், கமல்ஹாசன், விஜய், கார்த்தி, காத்தாடி ராமமூர்த்தி, எம். எஸ்.பாஸ்கர் உள்ளிட்டோர் இரங்கல் தெரிவித்துள்ளனர்.

டெல்லி கணேஷின் உடல் சென்னை ராமாபுரம் செந்தமிழ் நகர் பிரதான சாலையில் பொதுமக்களின் அஞ்சலிக்காக வைக்கப்பட்டுள்ளது. திரையுலகினர், அரசியல் பிரமுகர்கள், பொதுமக்கள் அவரது உடலுக்கு அஞ்சலி செலுத்தி வருகின்றனர். திங்கள்கிழமை காலை 10 மணியளவில் டெல்லி கணேஷின் உடல் தகனம் செய்யப்படவுள்ளது.

மறைந்த டெல்லி கணேஷுக்கு மனைவி பிச்சுலெட்சுமி, மகள் சாரதா, மகன் மகா டெல்லிகணேஷ் (மகாதேவன்) ஆகியோர் உள்ளனர்.

திருநெல்வேலி அருகே உள்ள வல்லநாடுதான் டெல்லி கணேஷின் பூர்விகம். படித்துவிட்டு, தலைநகர் தில்லியில் விமானப் படையில் பணியாற்றியபோது, அங்கே நாடகம் அரங்கேற்றியதுதான் அவருக்கு நடிப்பில் பிள்ளையார் சுழி போட காரணம்.

1964 முதல் 1974 - வரை இந்திய விமானப் படை வீரராக இருந்தார். அங்கு செயல்பட்டு வந்த தக்ஷிண பாரத நாடக சபா குழுவில் உறுப்பினராக இருந்தார். பின்னர் சென்னைக்கு வந்து காத்தாடி ராமமூர்த்தியுடன் நட்பு ஏற்பட, அவரின் நாடகக் குழுவில் இணைந்து பல்வேறு நாடகங்களில் நடித்தார்.