தாமிரவருணியில் கழிவுநீர் கலப்பா?

தாமிரவருணி நதியில் கழிவுநீர் கலப்பதைத் தடுக்கக் கோரி தொடரப்பட்ட வழக்கு தொடர்பாக சென்னை உயர்நீதிமன்ற மதுரை அமர்வின் நீதிபதிகள் ஞாயிற்றுக்கிழமை நேரில் ஆய்வு செய்தனர்.

தூத்துக்குடி மாவட்டம், முத்தாலங்குறிச்சி கிராமத்தைச் சேர்ந்த காமராசு என்பவர், தாமிரவருணி நதியில் கழிவு நீர் கலந்து நதி மாசுபடுவதாகவும், அதனை பாதுகாக்க வலியுறுத்தியும் பொதுநல வழக்கை சென்னை உயர்நீதிமன்ற மதுரை அமர்வில் தொடர்ந்திருந்தார்.

வழக்கை விசாரித்த நீதிமன்றம் தாமிரவருணி நதியில் கழிவுநீர் கலப்பதை உள்ளாட்சி அமைப்புகள் உடனடியாக தடை செய்ய வேண்டும். நதியை பாதுகாக்க வேண்டும் உள்ளிட்ட பல்வேறு வழிமுறைகளை வகுத்து கடந்த மார்ச் மாதம் உத்தரவு பிறப்பித்தது. ஆனால், நீதிமன்ற உத்தரவு அமல்படுத்தப்படவில்லை எனக் கூறி அவர் நீதிமன்ற அவமதிப்பு வழக்கு தொடர்ந்தார்.

இந்த வழக்கினை விசாரித்த நீதிபதிகள் ஜி.ஆர்.சுவாமிநாதன், பி.புகழேந்தி அமர்வு, நதியில் உள்ளாட்சி அமைப்புகள் கழிவுநீர் கலப்பது உள்ளிட்ட பிரச்னைகளை தடுக்க எடுக்கப்பட்ட நடவடிக்கை குறித்து நேரில் ஆய்வு செய்வோம் என உத்தரவிட்டது.

அதன்படி, நீதிபதிகள் இருவரும் திருநெல்வேலிக்கு ஞாயிற்றுக்கிழமை வந்தனர்.