மணிப்பூர்: 11 தீவிரவாதிகள் சுட்டுக் கொலை

கடும் சண்டையில் 2 வீரர்கள் காயம்

மணிப்பூரின் ஜிரிபாம் மாவட்டத்தில் பாதுகாப்புப் படையினருடன் திங்கள்கிழமை நடந்த துப்பாக்கிச் சண்டையில் 11 தீவிரவாதிகள் சுட்டுக் கொல்லப்பட்டனர்.

இந்த மோதலில் சிஆர்பிஎஃப் வீரர்கள் இருவர் காயமடைந்தனர். இதில், ஒருவரின் உடல்நிலை கவலைக்கிடமாக இருப்பதாக அதிகாரிகள் தெரிவித்தனர்.

கடும் சண்டை: இந்தத் தாக்குதல் தொடர்பாக அதிகாரிகள் கூறியதாவது:

ஜிரிபாம் நகருக்குத் தெற்கே 30 கி.மீ. தொலைவில் அடர்ந்த வனப்பகுதி மற்றும் மலைகளால் சூழப்பட்ட போரோபெக்ரா கிராமம் அமைந்துள்ளது. அங்குள்ள காவல் நிலையம் மற்றும் அதையொட்டி அமைந்த மத்திய ஆயுதக் காவல் படை (சிஆர்பிஎஃப்) முகாம் மீது அதிநவீன ஆயுதங்களைப் பயன்படுத்தி தீவிரவாதிகள் திங்கள்கிழமை பிற்பகல் 2.30 மணியளவில் துப்பாக்கிச் சூடு நடத்தினர். தொடர்ந்து அருகேயுள்ள சந்தைக்குள் நுழைந்த தீவிரவாதிகள், கடைகளுக்குத் தீ மூட்டியதுடன் பொதுமக்களின் வீடுகளையும் சூறையாடினர்.

மத்திய காவல் படையினர் மற்றும் மாநில காவல் துறையினர் பதில் தாக்குதல் நடத்தியதால் இருதரப்பினர் இடையே சுமார் 45 நிமிஷங்களுக்கு கடும் துப்பாக்கிச் சண்டை நடைபெற்றது.இந்த மோதலில் 11 தீவிரவாதிகள் சுட்டுக் கொல்லப்பட்டனர். 2 சிஆர்பிஎஃப் வீரர்கள் காயமடைந்தனர். வீரர் ஒருவரின் உடல் நிலை கவலைக்கிடமாக இருப்பதாக அதிகாரிகள் தெரிவித்தனர்.