அரவிந்த் சிதம்பரம் சாம்பியன்

சேலஞ்சர்ஸில் வாகை சூடினார் பிரணவ்

சென்னை கிராண்ட்மாஸ்டர்ஸ் செஸ் போட்டியின் சாம்பியன் பட்டத்தை தமிழகத்தின் அரவிந்த் சிதம்பரம் கைப்பற்றினார். சேலஞ்சர்ஸ் பிரிவில் சாம்பியன் பட்டத்தை பிரணவ் வசப்படுத்தினார்.

தமிழ்நாடு விளையாட்டு மேம்பாட்டு ஆணையம், செஸ் பேஸ், எம்ஜிடி 1 சார்பில் கோட்டூர்புரத்தில் கடந்த 5-ஆம் தேதி தொடங்கிய இப்போட்டியின் கடைசி மற்றும் 7-ஆவது சுற்று ஆட்டங்கள் திங்கள்கிழமை நடைபெற்றன.

இதில் மாஸ்டர்ஸ் பிரிவில் முதல் போர்டில் அமெரிக்காவின் லெவோன் ஆரோனியன், ஈரானின் அமீன் தபதாபேயி மோதிய ஆட்டம் 15-ஆவது நகர்த்தலின் போது டிராவில் முடிவடைந்தது.

2-ஆவது போர்டில் செர்பியாவின் அலெக்ஸி சரானா, இந்தியாவின் விதித் குஜராத்தி ஆட்டம் 48-ஆவது நகர்த்தலின் போது டிரா ஆனது.

3-ஆவது போர்டில் இந்தியாவின் அர்ஜுன் எரிகைசி, பிரான்ஸின் மாக்சிம் வாச்சியர் லாதேரவுடன் பலப்பரீட்சை நடத்தினார். இதில் அர்ஜுன் எரிகைசி 38-ஆவது நகர்த்தலின் போது ஆட்டத்தை டிரா செய்தார்.

4-ஆவது போர்டில் ஈரானின் பர்ஹாம் மக்சூட்லூ, இந்தியாவின் அரவிந்த் சிதம்பரத்தை எதிர்கொண்டார். இதில் அரவிந்த் சிதம்பரம் 64-ஆவது நகர்த்தலின் போது வெற்றி பெற்றார்.