ஜனவரி முதல் நுழைவுத் தேர்வுகளில் சீர்திருத்தம்

மாநிலங்களின் ஆதரவைக் கோரும் மத்திய அரசு

நீட் உள்ளிட்ட நுழைவுத் தேர்வுகளில் எந்தவித சர்ச்சைகளோ அல்லது முறைகேடுகளோ நிகழாத வகையில் வரும் 2025 ஜனவரி முதல் சீர்திருத்தங்களை மத்திய அரசு மேற்கொள்ள உள்ளது. இந்த சீர்திருத்தங்களை முழுமையாக நடைமுறைப்படுத்த மாநில அரசுகளின் ஆதரவை மத்திய அரசு கோரியுள்ளது.

மருத்துவப் படிப்பு மாணவர் சேர்க்கைக்கான 'நீட்', பொது பல்கலைக்கழக நுழைவுத் தேர்வு (க்யூட்), கல்லூரி உதவிப் பேராசிரியர் பணிக்கும் மத்திய அரசின் இளநிலை ஆராய்ச்சி உதவித் தொகை பெறுவதற்கும் தகுதி பெறுவதற்கான தேசிய தகுதித் தேர்வு (நெட்) உள்பட தேசிய தேர்வுகள் முகமை (என்டிஏ) சார்பில் நடத்தப்படும் அனைத்து நுழைவு மற்றும் தகுதித் தேர்வுகளில் இந்த சீர்திருத்தங்கள் மேற்கொள்ளப்பட உள்ளன.

இஸ்ரோ முன்னாள் தலைவர் கே.ராதாகிருஷ்ணன் தலைமையிலான குழு அளித்த பரிந்துரையின் அடிப்படையில், இந்த சீர்திருத்தங்களை மத்திய அரசு மேற்கொள்கிறது.