தேவை அரசுக்கு மனமாற்றம்

அடிக்கடி நாம் காணும் காட்சி, வீதி யோரத்தில் சிலர் அலங்கோலமாக விழுந்து கிடப்பதாகும். பலர் எந்தவித பதைபதைப்புமின்றி, 'அவர் குடித்துவிட்டு கிடக்கிறார்' என்று கடந்து செல்வது வழக்கமான ஒன்று.

- இரா.கதிரவன்

அடிக்கடி நாம் காணும் காட்சி, வீதி விழுந்து கிடப்பதாகும். பலர் எந்தவித பதைபதைப்புமின்றி, 'அவர் குடித்துவிட்டு கிடக்கிறார்' என்று கடந்து செல்வது வழக்கமான ஒன்று. அநேகமாக தமிழ்நாட்டின் எல்லா ஊர்களிலும் காணக்கூடிய காட்சி இது. தவிர, மாலை இருள் நெருங்கும்போது, நீர்நிலைகளை ஒட்டியும், ஊருக்கு ஒதுக்குப்புறமான ஆற்றோரங்களிலும், மரத்தடிகளிலும் கூட்டமாக அமர்ந்து மது அருந்துபவர்களைப் பார்க்க முடியும்.

மதுவை முதல்முறையாக அருந்தும் வயது என்பது குறைந்த வண்ணம் உள்ளது; தற்போது 13 வயதில் சிறுவர்கள் மது குடிக்கத் தொடங்குகின்றனர். சுமார் 6% மரணங்களுக்கு மது ஒரு காரணமாக விளங்குகிறது. நம் மாநிலத்தின் கலாசார சீரழிவின் அடையாளமாக உள்ளது மதுக்கடைகளும் குடிகாரர்களும். ஒரு அரசுசாரா நிறுவனம் கணக்கெடுப்பு செய்தபோது கிடைத்த சில தகவல்கள்: குடிப்பவர்களில் 45% பேர் தங்கள் கவலைகளை மறக்கவும், 25% பேர் நண்பர்களுடன் மகிழ்ச்சியாக இருக்கவும் குடிக்கின்றனர். உடல்வலி தீர குடிப்போரும் மற்றும் மதுவுக்கு அடிமையாகிவிட்டதால் குடிப்போரும் ஒரு ரகம்.

பொருளாதாரம், கல்வி, சுகாதாரம் ஆகிய அடிப்படையில் முன்னேறிய மாநிலம் என்ற பெயர் தமிழ்நாட்டுக்கு உண்டு. ஆனால், இவற்றுடன், மது ஏற்படுத்தும் தாக்கத்தை இணைத்துப் பார்க்கும்போது, 'பூஜ்யபலன்' என்ற கோட்பாடு நினைவுக்கு வரும். அதாவது, ஆதாயம் மற்றும் இழப்பின் கூட்டுத்தொகை பூஜ்யமாகும். நிர்வாக மேலாண்மைத் துறையில் மிக முக்கியமாக தவிர்க்கப்படும் ஒரு சூழல் இந்த 'பூஜ்ய பலன்' என்பதாகும்.