மருத்துவர் சுப்பையா கொலை வழக்கு: தமிழக அரசின் மேல்முறையீடு ஏற்பு

மருத்துவர் சுப்பையா கொலை வழக்கின் குற்றவாளிகளை சென்னை உயர்நீதிமன்றம் விடுவித்ததை எதிர்த்து தமிழக அரசு தாக்கல் செய்த மேல்முறையீட்டு மனுவை உச்சநீதிமன்றம் வியாழக்கிழமை விசாரணைக்கு ஏற்றது.

இந்த மனு மீது எதிர்மனுதாரர்கள் பதில் அளிக்க நோட்டீஸ் அனுப்ப உத்தரவிட்டதுடன், விசாரணை நீதிமன்றத்தால் தண்டிக்கப்பட்டவர்களை விடுவித்த உயர்நீதிமன்றத்தின் உத்தரவு வியப்பை அளிப்பதாக நீதிபதிகள் அமர்வு கருத்துக் கூறியது.

கன்னியாகுமரி மாவட்டம், அஞ்சு கிராமம் பகுதியில் ரூ.10 கோடி மதிப்பிலான 2.25 ஏக்கர் நிலம் தொடர்பான பிரச்னையில், நரம்பியல் மருத்துவர் சுப்பையா என்பவர் சென்னை ராஜா அண்ணாமலைபுரத்தில் 2013-ஆம் ஆண்டு செப். 9-ஆம் தேதி கூலிப்படையினரால் கொலை செய்யப்பட்டார். இந்த வழக்கில் 10 பேரை போலீஸார் கைது செய்தனர். கைதானவர்களில் ஐயப்பன் என்பவர் அப்ரூவராக மாறினார்.