என்எல்சி முதல் அனல் மின் நிலையத்தை இடிக்கும் பணி தொடக்கம்

நெய்வேலி, நவ.15: கடலூர் மாவட்டம், நெய்வேலி என்எல்சியில் முதல் அனல் மின் நிலையத்தை இடித்து அகற்றும் பணிகள் தொடங்கி நடைபெற்று வருகின்றன.

நெய்வேலியில் பழுப்பு நிலக்கரி படிமம் கண்டறியப்பட்டதைத் தொடர்ந்து, அதை முதன்மை எரிபொருளாகக்கொண்டு இயங்கக்கூடிய தெற்காசியாவின் முதல் அனல் மின் நிலையம் நெய்வேலியில் அமைக்கப்பட்டது. இந்தோ-சோவியத் கூட்டு முயற்சியில் 600 மெகாவாட் மின் உற்பத்தித் திறன் கொண்டதாக, முதலாவது அனல்மின் நிலையம் 9 அலகுகளுடன் தலா 50 மெகாவாட் உற்பத்தித் திறன் கொண்ட 6 அலகுகளும், தலா 100 மெகாவாட் உற்பத்தித் திறன்கொண்ட 3 பிரிவுகளும் 1962-ஆம் ஆண்டு முதல் 1970-ஆம் ஆண்டு வரையிலான காலங்களில் மூன்று கட்டங்களாக ஆரம்ப மூலதனச் செலவு ரூ.77.81 கோடியில் உருவாக்கப்பட்டது.