பெருங்குடியில் பல்லுயிர் பூங்கா அமைக்கும் திட்டம் நிறுத்தம்

சென்னை மாநகராட்சி மன்றக் கூட்டத்தில் தீர்மானம்

பெருங்குடி குப்பைக் கிடங்கில் பல்லுயிர் பூங்கா அமைக்கும் திட்டம் நிறுத்தப்படுவதாக சென்னை மாநகராட்சி மாமன்றக் கூட்டத்தில் தீர்மானம் நிறைவேற்றப்பட்டது.

சென்னை மாநகராட்சியின் மாதாந்திர மாமன்றக் கூட்டம் மேயர் ஆர்.பிரியா தலைமையில் ரிப்பன் மாளிகை கூட்டரங்கில் வியாழக்கிழமை நடைபெற்றது. துணை மேயர் மு.மகேஷ்குமார், ஆணையர் ஜெ.குமரகுருபரன் ஆகியோர் முன்னிலை வகித்தனர்.

தொடர்ந்து மாமன்ற உறுப்பினர்கள் பேசியது:

மாநகராட்சி பூங்காக்களின் பராமரிப்புப் பணிகள் மொத்தமாக ஒப்பந்த அடிப்படையில், ஒரு நிறுவனத்துக்கு ஒதுக்கப்படுவதால் முறையாக பராமரிப்புப் பணிகள் மேற்கொள்ளப்படுவதில்லை. பல பூங்காக்களுக்கு, ஒரே நபர் ஒப்பந்தம் எடுத்து குறைந்த பணியாளர்கள் மூலம் பணிகளை மேற்கொள்கின்றனர். அதிகாரிகள் ஆய்வுக்கு வரும் போது, மற்ற பூங்காக்களில் இருந்து பணியாளர்களை வரவழைத்து பணி மேற்கொள்கின்றனர். சாலையோரக் கடைகளுக்கு வழங்கப்படும் அனுமதி அட்டையை சிலர் முறைகேடாக பயன்படுத்துகின்றனர் என்று குற்றஞ்சாட்டினர்.