ஹெச்.ராஜாவுக்கு 6 மாதம் சிறை: தண்டனையை நிறுத்திவைத்தது நீதிமன்றம்

சென்னை, டிச.2: பெரியார் ஈ.வெ.ரா. சிலை குறித்து சர்ச்சை பதிவு மற்றும் கனிமொழி எம்பி குறித்து அவதூறு பேச்சு தொடர்பான வழக்குகளில் பாஜக மூத்த தலைவர் ஹெச்.ராஜாவுக்கு விதிக்கப்பட்ட தலா 6 மாத சிறை தண்டனையை சென்னை சிறப்பு நீதிமன்றம் நிறுத்திவைத்தது.

பாஜக தமிழக ஒருங்கிணைப்புக்குழு தலைவரான முன்னாள் எம்எல்ஏ ஹெச்.ராஜா கடந்த 2018-ஆம் ஆண்டு மார்ச் மாதம் தனது சமூக வலைதளப்பதிவில், 'திரிபுராவில் லெனின் சிலை உடைக்கப்பட்டது போல தமிழகத்திலும் பெரியார் சிலை உடைக்கப்படும்' என பதிவிட்டிருந்தார். இதேபோல, கடந்த 2018 ஏப்ரல் மாதம், திமுக எம்பி கனிமொழி குறித்தும் கடுமையாக விமர்சித்து பதிவிட்டிருந்தார்.

இதையடுத்து ஹெச்.ராஜாவுக்கு எதிராக திமுக நிர்வாகிகள், தந்தை பெரியார் திராவிடர் கழகம் சார்பில் போலீஸில் புகார்கள் அளிக்கப்பட்டன. பெரியார் சிலை உடைப்பு குறித்து ஈரோடு மாவட்டம் கருங்கல்பாளையம் போலீஸாரும், கனிமொழிக்கு எதிரான புகார் குறித்து ஈரோடு நகர போலீஸாரும் ஹெச்.ராஜாவுக்கு எதிராக வழக்கு பதிவு செய்தனர்.