மக்களின் வாழ்வில் மறைந்துபோன அம்சங்கள்!

கிராமங்கள் என்றாலே இவையெல்லாம் இருக்கும் என்ற நம்பிக்கையை ஏற்படுத்தும் வகையில் சிலவகையான அடையாளங்கள் இருந்தன. கிராமங்களில் ஊர் பொதுக்கிணறு, சுமைதாங்கிக் கல், திண்ணை போன்ற அம்சங்கள் கட்டாயம் இடம் பெற்றிருந்தன. இவையனைத்தும் கடந்த கால கிராம மக்களின் வாழ்வில் ஒன்றிணைந்ததாக இருந்தன.

காலப்போக்கில் விரிவாக்கம், அடிப்படை வசதிகள் உருவாக்கம், நகர்மயமாதல், நாகரீக வளர்ச்சி, கலாசார மாற்றம் போன்ற பல்வேறு காரணங்களால் கிராமங்கள் அத்தகைய அடையாளங்களை இழந்துவிட்டன. சில அடையாளங்கள் தமக்கே உரித்தான முக்கியத்துவத்தை இழந்த நிலையில், சில அடிச்சுவடு கூட இல்லாமல் போய்விட்டன.

எக்காலத்திலும் நகரங்களுடன் ஒப்பிடுகையில் கிராமங்களில் தண்ணீர் தேவை அதிகமாகவே இருப்பதுண்டு. கிராமங்களைப் பொருத்தவரை அங்குள்ள ஏரி, குளம் போன்ற நீர்நிலைகளும், ஊர் பொதுக்கிணறும் தான் முக்கிய நீராதாரங்களாக இருந்தன.

வசதி படைத்தவர்கள் வீட்டினுள்ளோ அல்லது 'கொல்லைப்புறம்' எனப்படும் வீட்டின் பின்புறமோ கிணறு அமைத்திருந்தனர். ஆனால், பொதுமக்களின் தண்ணீர் பயன்பாட்டிற்காக ஒவ்வொரு ஊரிலும் ஒன்றுக்கும் மேற்பட்ட பொதுக்கிணறுகள் இருந்தன.

பொதுக்கிணறு கிராமப் பொதுமக்கள் சார்பிலோ அல்லது தனிநபராலோ அமைக்கப்பட்டிருந்தது. ஒவ்வொரு கிணறும் தனித்தனி பெயருடன் அழைக்கப்பட்டது. பொதுக்கிணறுகள் அவை அமைந்திருக்கும் தெருப்பெயருடனோ அல்லது அருகிலுள்ள கோயில் பெயருடனோ அழைக்கப்பட்டன. சுற்றுச்சுவர் அமைக்கப்பட்ட இக்கிணறுகளின் இருபக்கமும் தூண்கள் எழுப்பப்பட்டு உருளை அமைப்பும், பொதுவான முறையில் வாளியும் இருப்பதுண்டு. இவ்விரண்டு வகையான கிணறுகளும் ஆண்டுக்கு ஒருமுறை பொதுமக்களால் சுத்தம் செய்யப்பட்டு மீண்டும் பயன்படுத்தப்பட்டன.